Usti Labem Grand Prix: Pynkut ka India da kaba jop 12 tylli ki takma, kynthup ïa 8 tylli ki takma ksiar

New Delhi, Jylliew 21: Ka India ka la pyndep ïa ka jingïalehkai kaba khlaiñ ha ka 56th Grand Prix Usti nad Labem (European Boxing Gold Tournament) ha Czechia, da kaba khur 12 tylli ki takma, kynthup ïa 8 tylli ki takma ksiar, lai tylli ki takma rupa bad kawei ka takma rnong.
Ka kynhun ïakura jong ki kynthei ka la lamkhmat ïa ka jingïakhun, da kaba jop saw tylli ki takma ksiar bad kawei ka takma rupa na ki san ngut ki nongïalehkai. Ka nongjop takma Olympic ka Lovlina Borgohain (75kg), ka lahduh jong ka Asia ba mynta ka Preeti Pawar (54kg), ka Sakshi (51kg) bad ka Priya (60kg) baroh ki la khur ïa ka takma ksiar da ka jingjop kaba ïa mynjur lang ki nongbishar ha la ki jong ki jong ki phainal, katba ka Parveen (65kg) ka la ïoh ban khur ïa ka takma rupa.
Ka kynhun ïakura jong ki shynrang ka la ïaryngkat bad ki kynthei da kaba khur saw tylli ki takma ksiar, ha kaba u Jadumani Singh Mandengbam (55kg), Sachin (60kg), Ankush (80kg) bad u Narender (+90kg) ki la pyndep kum ki lahduh ha la ki jong ki jong ki kyrdan.
U President ka Boxing Federation of India u Ajay Singh, haba ai khublei ïa ka kynhun u la ong, “Khublei kyrpang ïa baroh ki nongjop takma jong ngi na ka bynta ka jingïalehkai ba itynnad jong ki ha ka 56th Grand Prix Usti nad Labem. Ban jop 8 tylli ki takma ksiar bad lai tylli ki takma rupa pyrshah ïa ki jingïakop ba khlaiñ ha ka pyrthei ka long ka jingjop kaba kyrpang bad ka pyni ïa ka jingaiti lut, ka jinglong ryntih bad ka mynsiem ïakhun jong ki nongïakura jong ngi.”
Ka Lovlina ka la pynliem ïa ka Melissa Gemini na Italy da 5-0 kol ha ka final jong ka kyrdan jingkhia kaba 75kg, katba ka Preeti ka la jop da kajuh ka jingkheiñ ïa ka nong France ka Jeyssa Marcel ha ka kyrdan 54kg. Ka Sakshi ka la pynskhem ïa ka jingjop da 5-0 pyrshah ïa ka nong France ka Mayssoun Bourega ha ka jingïakhun phainal kaba 51kg, bad ka Priya ka la pynliem ïa ka Barbora Maxova na Czechia da 5-0 ban khur takma ksiar ha ka 60kg.
Napdeng ki shynrang, u Jadumani u la pynliem da 4-1 ïa u Abdul Burton ka England ha ka phainal jong ka kyrdan 55kg. U Sachin bad u Ankush ki la jop da 5-0 ïa u Veres Rohland ka Hungary bad u Florian Daniel na ka Czech Republic, katba u Narender u la khur ïa ka jingjop kaba ïakhaid bha pyrshah ïa u Davit Chaloyan ka Armenia ha ka heavyweight final.
U Aditya Pratap Yadav (65kg) bad u Kapil Pokhariya (90kg) ki la hap ban hun ïa ka takma rupa hadien ba ki la shah rem ha la ki jong ki jong ki phainal, katba u Sumit Kundu (70kg) u la khur ïa ka takma rnong marwei na ka bynta ka India.
Ka Usti nad Labem Grand Prix kadei kawei na ki lympung ïakura kaba la rim tam bad kaba pawnam tam ha Europe, ka shakri kum ka rynsan kaba kongsan ïa ki nongïalehkai ka ri India kiba dang bteng ban pynkhreh ïa ka Commonwealth Games 2026 ha Glasgow.
Ki nongjop takma ïa ka India ki long:
Takma Ksiar: Sakshi (51kg-W), Preeti Pawar (54kg-W), Priya (60kg-W), Lovlina Borgohain (75kg-W), Jadumani Singh Mandengbam (55kg), Sachin (60kg), Ankush (80kg), Narender (+90kg)
Takma Rupa: Parveen (65kg-W), Aditya Pratap Yadav (65kg), Kapil Pokhariya (90kg)
Takma Rnong: Sumit Kundu (70kg)