Ki nongmihkhmat ki mynjur ïa ki kyndon bad ki mat aïu halor ka SIR, kidei ban pynshai bha ïa ki paidbah

Kaba sngewlyngngoh ba ka la mih ka khubor ha ki rynsan bapher, ba ka elekshon MP, kan lah ban poi haduh ha U Risaw 2026 bad lada ka long kumta, ka pyni ba katei ka elekshon, kan shimpor haduh 8 bnai ban pynlong, na kaba ju dei hynriew bnai, hadien ka jingkhlad noh jong U MLA ne U MP ruh kumjuh.

Ka daw, kaba ki pyni, ka long ba ka dei na ka jingpynbeit kyrteng lane kata ka special intensive revision (SIR) bad ngim tip, ïa ki kyndon jong ka SIR bad la ki seng saiñ pyrthei kiba mihkhmat ban ïakren, ki mynjur halor ki kyndon aïu bad katei ka mat, ka la dei ban pynshai bha sha u paidbah.

Na kaei kaba paw ha kiba bun ki jylla, la ïohi ba ka SIR, ka dei ka buit ban weng kyrteng ïa ki nongthep vote bad ka dei ruh ka buit ban thep kyrteng ïa kiba ka Election Commission ka sngew ïahab bad dei na kata ka daw, ba ka mih ka jingïakren, ba la weng kyrteng kyrteng ïa shiklur ngut antad ha West Bengal, nangta la weng ïa bun phew lak ha Bihar bad kumta ter ter.

Ha Meghalaya, kaei ka jingmut tynrai jong ka SIR bad ki seng saiñ pyrthei, ki dei ban sngew thikna bha, ïa katei ka bynta, namar ba ka jingkwah jong kiba bun, ka long ban weng kyrteng ïa ki wan wir wan hap, hynrei lada ka dei pynban ïa ki trai shnong lajong, kumta katei ka dei buit kam pynjot pynpra ne pynkylla nongwei ïa ki trai shnong.

Nangta, lada na ka daw jong ka SIR, ka hap ban pynjlan tam haduh 2 lane 3 bnai ïa ka elekshon ban jied MP, kumta katei ka dei sa kawei pat ka mat kaba sngewkhia haduh katta katta, namar ba ka kam jied MP, kam dei tang ban shu leit thung kubi, thung muli sha Delhi, hynrei ka dei ban tuklar ïa ki aiñ kiba eh bad kiba shon, kiba ktah ïa ka jinglong jingman ba kyrpang jong u paidlang ka Ri Khasi Jaiñtia lane ka Shillong Parliamentary Constituency bad kumta ka jingweng ne thep kyrteng ïa ki nongthep vote, ka ban jia ha baroh kawei ka jylla, kam dei pat ban khanglad ïa ki nongjied jong ka Shillong Lok Sabha Constituency, ba kin jied dei por, ïa la u jong U MP.

Lah ban pynkynmaw ba na ka jingpynmih jingpynbna jong ka election commission jong ka ri India ban pyndep bad pynlong shwa ia ka SIR ha shwa ban pynlong ïa kino kino ki elekshon ha kino kino ki jylla kiba la dei ka por ban pynlong elekshon ka la wanrah ruh ka jingtharai sniew jong kiba bun ki seng saiñ pyrthei kiba don ha ri thor kiba la kynnoh ruh ba ka la don ka jingshah weng noh jong kiba bun byllai ne bun byllien ngut ki nongshong shnong ka ri kiba la duh noh ïa la ka jong ka hok ban ïoh thep vote.

Ka la mih ruh ka jingkynnoh ba kane ka dei ka buit jong ka seng BJP hapoh ka Sorkar Pdeng ban pynduh noh ïa kito ki nongthep vote jong kiwei pat ki seng saiñ pyrthei hynrei ban ïoh lad beit tang ki nongthep vote jong ka BJP ne kiwei pat ki seng saiñ pyrthei kiba don lang hapoh ka Sorkar National Democratic Alliance (NDA).

La kynnoh ruh ba ka jingpynkloi jong ka Election Commission jong ka ri ban pynlong ïa ka SIR kadei ruh da kaba kohnguh ïa ka jingbhah jong ka Sorkar Pdeng ba dei ban pyndep ïa ka SIR khnang ban lap ïa ki jingïoh lad thep vote da ki nongshong shnong beaiñ ne ki bar ri kum ki nong Bangladeshi bad kiwei ki poi wir.

Hynrei kumba la jia pat ha West Bengal bad Bihar la kynnoh ba bun kiba la shah pynduh ia ka hok ban thep vote dei pynban ki trai shnong bad ki trai ri.

Kumta ha Meghalaya ruh ki seng saiñ pyrthei kidei ban pynbna paidbah ïa ka jingïalang bad ka elekshon commission jong ka jylla halor kane ka jingpynlong ïa ka SIR ba ïoh ka ktah pynban ïa ki trai jylla kiba bun ki ban shah pynduh leit thep vote.

Lah ruh ban ong ba ka jingïoh lad ban thep vote kadei ka hok tynrai jong ki nongshong shnong ba pura jong ka ri kumba la suit la shor bad pynkup bor lyngba ka riti synshar jong ka ri India, kumta na ka jingpynlong ïa ka SIR kam dei ban long ka lad shim kabu saiñ pyrthei jong kino kino ki seng saiñ pyrthei khamtam eh kito kiba bat ïa u lakam synshar ha ki sorkar jylla ne Sorkar Pdeng.

Lah ruh ban ong ba ka jingpynlong ïa ka SIR ha ki jylla ba hap ban pynlong ïa ki elekshon sha ki ïingdorbar thaw aiñ ne MP elekshon ka la buh ruh ka jingsngewkhia ba ïoh don ki jingpynkylla ha kaba ïadei bad ka jingshah pynjah jong ki nongthep vote kiba dei ki nongshong shnong ba pura jong kano kano ka jylla tang na ka daw jong ka jingtieng ïa ki mynder ri khamtam ki nong Bangladeshi kiba ïohlad ban rung khlieh hapoh kano kano ka jylla ne hapoh ka ri da ki kot ki sla kiba thok ne kiba shu thied beaiñ da ka jingpynbam pisa ne kiwei pat ki lad ki lynti tang ban ïoh long ki nongshong shnong ba pura jong kano kano ka jylla ne jong ka ri India baroh kawei.