SSA U-20 4th Division 2026: Mad jingjop ka Them Rangshken, Mawpdang bad ka Weilyngkut ha ka pre Quarter

Shillong, Jylliew 21: Ka Them Rangshken SC, ka Mawpdang SC bad ka Weilyngkut Area FCC ki la jop ïa la ki jong ki jong ki jingïalehkai Pre-quarter final jong ka lympung U-20 Fourth Division Football League 2026, ba la pynïaid da ka Shillong Sports Association, kiba la long ha ka sngi Saitjaiñ.
Ka Them Rangshken ka la jop pyrshah ïa ka Mawnianglah Youth SC (Pool 1), ka Mawpdang SC ïa ka New Challenger FC (Pool 2), katba ka Weilyngkut ïa ka Thynroit SC (Pool 3).
Ka shi kol jong u Banshanskhem Marbaniang ha ka minit kaba 9 jong ka kylla step ka la biang pura ïa ka Them Rangshken ba kan mad ïa ka jingjop da 1-0 ha kane ka jingïalehkai kaba tang 80 minit.
Ha ka Pool 2, la sakhi ïa ka Mawpdang kaba la pynjemkhnap ïa ka New Challenger da kaba jop 5-0, ha kaba u Samborlang Langte (36 & 42’) u la pynkhihjar ar sien. U Marbiang Kharbhih (40’) u la thep shi sien, katba u Jonathan Kharbani (80+2’) bad u Edmon Marngar (80+4’) ki la pynkhihjar mar kawei ha ki minit pynjlan ba khatduh shuwa ban kut ka jingïalehkai.
Nangta ka Weilyngkut Area FCC ka la pynliem da tang 1-0 ïa ka Thynroit. Hadien ka kylla step kaba khlem kol ka Weilyngkut ka la pynkhihjar lyngba u Sengrak Jana ha ka minit kaba 42 ban khur ïa ka jingjop.
Ka jingïalehkai pre quarter jong ka 4th Division ha kane ka sngi nyngkong kan long hapdeng ka Nongkseh United SC pyrshah ïa ka Phir Kurbah Memorial, ha ka por 4 baje janmiet, ha SSA Stadium.

Ka prokram ïalehkai SSA 3rd Division 2026 ha kane ka sngi Nyngkong:
Jaka-MFA Ground: (Por 1Pm) Lamlynti pyrshah ïa ka Nongumlong,
Jaka-SSA Stadium: (Por 1Pm) Mawlynrei yrshah ïa ka Umiew Maw U Sam