Williamnagar, Naitung 20: Ki seng bhalang kiba kynthup ïa ka GSU, FAF, FKJGP ba ka AIGU jong ka Williamnagar ki la rai ban pynlong jingpakhang lynti ïa ki nongtrei MeECL jong ka sor Williamnagar baroh kawei ha ka 21 bad 22 tarik Naitung 2022.
Kum ban shu kdew hangne ba ka jingdawa jong ka long ban pynbiang ïa ka bording ba thikna ha baroh kawei ka bynta ka Garo Hills bad ka jingpynbiang nongtrei ban pynjanai ïa ka jingshakri ka tnad sha ki thaiñ.
Kine ki seng bhalang ki la ong ba kane ka jingpakhang lynti kan ym ktah satia ïa kito ki nongtrei kiba dei ban maramot ïa kino kino ki laiñ ba don jingthut bad ïa kito kiba dei ban lum bai bording pyntip u Saljrang Tengrik R.Marak President ka GSU Eastern Zone, Williamnagar.
Na ka liang jong ki ruh ki la dep ban ai jingtip sha u Deputy Commissioner ka East Garo Hills myn ha ka sngi Nyngkong ha kaba ïadei bad kane ka jingpakhang lynti ïa ki nongtrei ka MeECL, kaba ki la rai ban pynlong ha ka sngi Balang bad sngi Palei namar ka jingbym lah ban pynïoh ïa ka jingdawa ba ki la buh ha ka tnad.
