Pynlong ka ophis DM&HO-EJHD ïa ka District Stop Diarrhoea Campaign 2026 ha Ladrymbai

Khliehriat jylliew 18: Kum shibynta ban pynshai paidbah halor ki lad jingiada ban lait na ka jingpang pynhiar, ka ophis jong u District Medical & Health Officer (DM&HO), East Jaiñtia Hills District ha ka prokram ba la pynlong ha Ladrymbai Parking Lot (Plol Compound), mynta ka sngi ka la pyllait paidbah ïa ka District Stop Diarrhoea Campaign 2026 bad kane ka jingialap paidbah ne campaing ka hap hapoh ka skim “iada ïa ka jingpang pynhiar lyngba ka jinglehkhuid bad da kaba pyndonkam ia u ORS (Prevent diarrhoea through cleanliness and proper use of ORS)”.
Haba kren ha ka jingialang ka District Immunization Officer (DIO), East Jaiñtia Hills District, ka Dr. (Mrs.) N. P. Suchiang, ka la ong ba kane ka jingialap paidbah, ka Stop Diarrhoea Campaign ka dei kaba ju pynlong man la u snem bad kane kaba pynlong mynta u snem pat la pynlong ha ki jaka ïew ha ka jaka ba don bun ki briew, ka la ong ba ka jingpang pynhiar ka ktah ïa kiba bun ki briew kiba ha ki kyrta bapher bapher khamtam ka ktah ïa ki khynnah kiba hapoh ka san snem kyrta bad ruh kito kiba la rangbah, ka la ong ba katkum ka jingiohlum jingtip ki la don haduh 5,990 kiba ioh pang pynhiar myn ha u snem ba la leit, ka la ong ruh ba katba ki briew ki dang wad jingsumar ïa ka jingpang pynhiar hynrei kaba ap jingma pat ka dei ka dehydration ne ka jingtyrkhong ka met bad ong ba ynda la tyrkhong ka met ne ynda la kylla dehydration donkam ban dih da u Oral Rehydration Solution (ORS), ka la bynrap ruh ba ïa ki khynnah kiba ioh ïa ka jingpang pynhiar la sumar ïa ki da ki dawai antibiotics bad kaba kham bha ka long ban phah thiah ha ki hospital ban ioh jingsumar namar tang ki dawai antibiotics kim lah ban pynsangeh ïa ka pynhiar.
Ka Dr Suchiang ka la pynshai shuh shuh ba ka jinglehkhuid ka long kaba donkam ha kaba ka long kaba donkam ruh ban pynkhuid ïa ki sawdong sawkun ruh, ban dih da ka um kaba la shet pynthnam ban bam da ki jingbam kiba la shet ih bha, haba kren halor ka phang ba ïadei bad ka bam ka dih, ka Dr Suchiang ka la pynkynmar ïa kawei ka jingjia kaba jia ha shnong Narwan ha kaba ki briew ki ioh pang na ka daw ka jingbam lane ka food poisoning kaba la suba jur ba ka dei na ka daw ba la pyndonkam da ka um kaba jakhlia.
Haba IOH pang pynhiar, la ai jingmut ban dih da ki dawai kuli, ki zinc tablet hapoh khatsaw sngi bad kyntu ruh ïa ki paidbah ba ki dei ban wad jiingsumar mardor khamtam ynda la tyrkhong ka met ne kylla dehydration lane lada khleh sam ka paiñkhana, namar ka dehydration ka lah ban ktah ïa ki doh jem ne ki organs, kum ki khyllai, ka kyntu ïa baroh ban don ka jingiatreilang ban pynmlien ban im ha ka jinglehkhuid, leh suba ban iada na ka jingpang pynhiar.
Ha kane ka prokram ki nongtrei jong ka Ladrymbai Urban Health and Wellness Centre (UHWC) ki la pyni nuksa ïa ki paidbah kumno ban sait ïa ki kti ha ka rukom kaba dei ban lait na ki khñiang jingpang.
Kiba la ai jingkren ki kynthup ruh ka Medical Officer, In-Charge, Ladrymbai Urban Health and Wellness Centre (UHWC), ka Dr. (Ms.) D. Sayoo, u Block Programme Manager (BPM), National Health Mission (NHM), Khliehriat Block, u bah Lastone Bamon bad kiwei kiwei.