Nongstoiñ, Jylliew 18: U Superintendent of Police West Khasi Hills District, Bah H. Kharkongor MPS, u la pyntip sha ki paidbah ba katkum ka hukum ba la pynmih ha ka 28 tarik Ïaiong 2026 da ka Kashari ba kyrpang (POCSO) Nongstoiñ, West Khasi Hills District Meghalaya, u Bah Starfull Rongrin na ka shnong Umdang Dong Block P.S. Shallang, West Khasi Hills District, u la shah pynbna bad kheiñ kum u nongleh bymman ba la pynbna da ka Hon’ble Special (POCSO) Court Nongstoiñ, katkum ka hukum ba la rai ha ka 5 Rymphang 2026.
La pyntip ruh sha ki paidbah ba ka jingbishar ïa kane ka mukotduma kan ïaid shakhmat wat ha ka jingbym don jong u katkum ka kyndon 356 jong ka Bharatiya Nagarik Suraksha Sanhita (BNSS), lada um lah ban wan mih hakhmat ka Kashari hapoh 30 sngi naduh ka sngi ba la pynmih ïa kane ka jingpynbna. Ïa kane ka jingpynbna la pynmih na ka bynta ka jingtip bad jingpynsngewthuh ïa ki paidbah baroh.
