Pynhap pyrda ka HYC ïa ka lympung phutbol ryngkat ka jingïarap ïa ki longïing ba duna ka ïoh ka kot

Ranikor, Jylliew 16: Ka Hynñiewtrep Youth Council (HYC) jong ka Ranikor Circle ka la pynhap pyrda noh ïa ka lympung jingïalehkai kynjatbol ba la pynlong kum shi bynta ban kyntiew ïa ki samla donsap ha ka thaiñ bad ban pynshlur ïa ki ban kiar na ki jingdih pynbuaid, khamtam na u drok uba la sdang ban rung wat sha ki nongkyndong mynta.
Ha ka jingïakhun phainal, ka kynhun NNS&CC ka la lah ban rah ïa ka nam lahduh hadien ba ka la pynliem ïa ka Nongtnger Football Club da 2 – 0 kol.
Ïa ka goal kaba nyngkong la thep da u Jacksinson Sangleiñ, ha ka minit kaba 9 jong ka jingïalehkai ha ka kyllastep. Katba ïa ka goal kaba ar pat la thep da u Bankit Lyngkhoi, ha ka minit kaba 36 bad lyngba kine ki ar kol ka la pynthikna ba ka NNS&CC kan jop ha kane ka lympung phainal.
Ha kajuh ka por, ka HYC ka la pynlong ruh ïa ka prokram jingïarap ïa ki longïing kiba duna ka jingïoh ka kot da kaba sam khaw bad kiwei de ki jingïarap.
Ha kane ka jingïalang la donlang ruh u Myntri Shnong jong ka shnong Nongnah uba la ai ka jingïatreilang bad ka jingkyrshan ïa kane ka jingthmu ba bha jong ka seng.
Ïa kane ka khubor la phah da u Samla Firstlightstar Kharsaw uba dei u Public Secretary ka HYC Ranikor Circle.