Mawkyrwat, Jylliew 17: Ka ophis jong ka District Sports Officer (DSO), South West Khasi Hills District, Mawkyrwat ka la ïoh ban sdang ïa ka South West Khasi Hills District Level Inter-School Subroto Cup Football Tournament 2026 na ka bynta ki khynnah kiba hapoh 15 snem (Shynrang) bad ki khynnah kiba hapoh 17 snem (Shynrang bad Kynthei).
La ïoh ban sdang ïa kane ka lympung ïalehkai da ka jingïadon ryngkat jong ka Kong Daisy Marweiñ, District Sports Officer, South West Khasi Hills District, Mawkyrwat.
La pynlong ïa kane ki jingïalehkai ha ki lai tylli ki madan, kata ha madan Rowell Lyngdoh, Mawlangwir, ha madan Mawpyllun, Mawten, bad ha madan MDSA, Nonglang ha kaba ki don baroh 28 tylli ki skul napoh jong ka South West Khasi Hills District, Mawkyrwat kiba la wan ban ïashimbynta.
Ki skul kiba ïashimbynta ki don 13 kynhun ha ka kyrdan ki khynnah kynthei kiba hapoh 17 snem, 18 kynhun ha ka kyrdan ki khynnah shynrang kiba hapoh 17 snem bad 17 kynhun ha ka kyrdan ki khynnah shynrang kiba hapoh 15 snem.
Ka jingïalehkai jong kane ka South West Khasi Hills District Level Inter-School Subroto Cup Football Tournament 2026 mynta ka dang ïaid shakmat bad na ka liang ka ophis kam pat lah ban pyntikna ïa ka jingpynkut ïa kane ka lympung ïalehkai namar ki jingïatyngkhuh bad ki eksamin shiteng snem jong ki khynnah skul bad ynsa nang pynbeit hadien.
