Nongpoh, Jylliew 16: Ka seng Ri-Bhoi Youth Federation (RBYF) sengkmie mynta ka sngi ka la leit ban ujor syndon sha u Deputy Commissioner ka Ri-Bhoi District u ba dei ruh u Chairman ka Vidyalaya Management Committee halor ka jinglap ba haduh 4 ngut ki khynnah kiba ym dei ki trai shnong jong ka district bad kiba dei ruh na shabar jylla, ki la ioh rung skul ha Jawahar Navodaya Vidyalaya (JNV), Ñiangbari.
Katba ki spah ngut ki kmie ki kpa ha Ri-Bhoi District, khamtam kiba duna ka jingïoh ka kot, ki ju pyrshang ban pynrung ïa la ki khun ha JNV Ñiangbari namar ka jingmyntoi bad ka jingduna ka jinglut jingsep ha ka pule puthi, hynrei ka RBYF ka la pynpaw ïa ka jingsngewkhia ba kane ka kabu kaba dei ban ioh da ki khynnah ka district la shah knieh noh da kiwei pat.
Ha ka jingïalam u Samla Shembok Marbah, Education Secretary ka seng, ryngkat bad u Samla Rishan Nongtri, Assistant Education Secretary, bad u Samla Spirit Hinge, Employment Secretary, ki nongïalam ka seng mynta ka sngi ki la aiti da ka jingthoh sha u Deputy Commissioner ka Ri-Bhoi District, u Dr. Abhishek Saini, ban dawa ïa ka jingtohkit halor katei ka bynta.
Haba kren sha ki lad pathai khubor hadien ka jingïakynduh ïa u DC, u Samla Shembok Marbah bad u Samla Rishan Nongtri ki la ong ba ka seng ka la lap ba ar ngut ki khynnah na Assam ki la ioh rung ha ka bhah jong ki khynnah na Umling Block bad Umsning Block. Nalor kata, uwei u khynnah na Bihar u la ioh rung ha ka bhah jong ka Umling Block da kaba pyndonkam tang ïa ka Residential Certificate na Tamulikuchi, Byrnihat, katba bun kiwei pat ki kot ki sla jong u ki pyni ba u dei na Bihar. Uwei pat u khynnah, kat haduh mynta, ym pat lah ban pynshisha pura ïa ki kot ki sla jong u.
Ka seng ka la ong ba kane ka long ka jingiuhroit ïa ka hok jong ki khynnah trai district kiba dei hok ban ioh ïa katei ka kabu pule. Ka la pynpaw ruh ïa ka jingsuba ba lah ban don kiba pyndonkam bakla ïa ka bor lane ki lad jingïarap tang na ka bynta ka jingmyntoi shimet.
Shuh shuh, ka RBYF ka la maham ïa ki nongïalam shnong ba kim dei ban ai kulmar ïa ki Residential Certificate khlem da bishar bniah, namar kane ka lah ban ktah jur ïa ka lawei jong ki khynnah trai jylla. Ka seng ka la ong ba katba ki kynhun bapher bapher ki dang ïakhun na ka bynta ban pyntreikam ïa ki aiñ kum ka Inner Line Permit (ILP) bad ka Meghalaya Residents Safety and Security Act (MRSSA), hynrei kum kine ki jingjia ki wan jia kaba pynsngewsih shikatdei bad kiba pynduhnong ïa ki trai shnong bad ki khynnah pule jong ka district.
Ka RBYF ka la kyrpad ruh ïa ki bor ba dei peit ba kin tohkit mardor ïa kane ka kam, ban weng noh ïa kino kino kiba la ïoh rung da ki kot ki sla kiba ym biang, bad ban ai noh ïa ka kabu sha ki khynnah trai district kiba dei hok ban ïoh rung ha katei ka skul.
Halor kane ka jingujor, u Deputy Commissioner, u Dr. Abhishek Saini, u la kular ba un shimkhia ïa ka kam bad un pynlong ïa ka jingtohkit kaba bniah ban lap ïa ka jingshisha baroh.
