Shillong, Naitung 20 : Ka Mawlai SC ka dang ïai bat ha ka kyrdan ba nyngkong ha ka miej kheiñ point jong ka lympung ïalehkai OC Blue Shillong Premier League (SPL) 2021-22 hadien ba ka la ïakhaid bad ka Mawkhar SC kaba dang neh ha ka kyrdan ba sha trai duh ha ka jingïalehkai ha ka sngi Balang ha madan Third Ground, Polo, Shillong.
Haba phai sha kine ki ar tylli ki team, ka Mawkhar ka la khur point ha ka jingïalehkai ba nyngkong hynrei ha ki sawsien ïakhun kiba bud ka la mad nam rem, katba ka Mawlai kadei ka kynhun kaba khlem pat mad nam rem da kaba jop baroh sansien khlem ka jingshah pynphai kol. Baroh ar tylli ki club (Mawkhar bad Mawlai) kidei kiba dang shu kiew kyrdan na ka First Division ha u 2019, ha kaba ka Mawkhar ka long ka kynhun lahduh.
Lyngba kane ka jingïakhaid ka pynlong ïa ka Mawlai ban kut noh ka jingjop lynter, hynrei ka dang bteng kum ka kynhun ba khlem pat shah thep kol. Kumjuh ruh ka pynlong ïa ka Mawkhar ban ym mad nam rem hynrei kadei ka kynhun kaba dang neh ha trai duh jong ka miej kheiñ point.
Ha kane ka jingïalehkai, ka Mawlai kam shym la kheiñ sting ïa ka Mawkhar ha kaba ka la pynkhlaiñ ïa ka kynhun, hynrei ka khlem lah ban pyndep ha ka liang ka thep kol. Ka Mawlai ha ka jingïalehkai ba dang ïaid shi minit ka la ïoh ïa ka jingshut corner hynrei ka khlem ïoh pat ban pynkhih jar.
Ka Mawkhar ruh ka la ïoh ban pynsmiej lyngba u Restorewell Marbaniang uba la khyrwit na jngai hynrei u rangap kol ka Mawlai u Neithovilie Chalieu hynrei utei u rangap kol u la ïoh ban pyndei ïa ka bol sharud.
Ha ka minit ba 36, u Aibiangmame Nongneng u la ïoh rah ïa ka bol hapoh box jong ka Mawlai da kaba pynshat ha ka rukom kaba itynnad bha, bad u Charles Lyngdoh u la ïoh ban khyrwit ïa ka bol ha kaba ki paralok ba shong ben ki dang mut ba ka bol ka la rung hynrei ka bol ka la lait sali ban rung shapoh ka jar.
Nalor ba ka la duh kawei ka kabu kaba biang bha, ka Mawlai ka khlem lah ban da ïoh lad ha ka jingïalehkai jong ka kylla step hynrei ka la sdang pat ban pynkhlaiñ ha ka jingïalehkai jong ka kylla miet.
Ha ka kylla miet, u Samuel Lyngdoh Kynshi u la rah marwei ïa ka bol hynrei ki rangïalehkai dien ka Mawkhar ki la kerkut bad kyrda ïa ki jingpyrshang thep kol. u Widenstar Kharsati rangap kol u la ïoh ban kem ïa ka bol ba la pyndei da u Wanboklang Lyngkhoi da ka khlieh.
Ka jingïalehkai hapdeng kine ki ar tylli ki team ka la long kaba mar ïabam ha kaba baroh arliang ki la ïakhun tyngeh ban thep kol hynrei haduh kaba kut jong ka jingïalehkai ki la hap ban hun ban ïasam mar shi point
Mynta ka sngi Palei ka jingïalehkai kan long hapdeng ka Langsning FC pyrshah ïa ka Ryntih SC ha ka por 4 baje janmiet.
