Sdang ka project TRIBES ha Marngar ban kyntiew ïa ka kamai ki nongrep bad nongri dohkha

Nongpoh, Jylliew 15: Ka la long ka jingkyrkhu kaba khraw ïa ki nongrep bad ki nongri dohkha ha ka thaiñ Marngar kaba hap hapoh ka Umling C&RD Block, Ri-Bhoi District, hadien ba la plie paidbah ïa ka projek Tribal Resilience Initiative for Building Environmentally Sustainable Livelihoods (TRIBES) da ka seng Kalong-Kapili, kaba ju trei shitom ban kyntiew ïa ka rep ka riang kaba neh, bad ki lad kamai kiba ïadei bad ka jingïada ïa ka mariang.
Ïa kane ka projek la bei tyngka da ka National Bank for Agriculture and Rural Development (NABARD), Meghalaya Regional Office, bad yn pyntreikam da ka Kalong-Kapili haduh san snem, ha ka jinglut kaba kot sha ka T. 1.40 klur. La khmih lynti ba kumba 200 ngut ki nongrep bad nongri dohkha na katei ka thaiñ kin ïoh jingmyntoi na kane ka projek.
Ïa kane projek la plie paidbah da u Mayralborn Syiem, MLA ka Nongpoh Constituency, ha ka jingdonlang ka J.R. Blah, General Manager bad Officer-in-Charge ka NABARD Meghalaya Regional Office, u Jyotish Talukdar, Director ka Kalong-Kapili, u Manjil Parashar, Project Coordinator ka TRIBES Project, ka Aslasha Shraborni, Fishery Expert ka Kalong-Kapili, ki ophisar na ka tnad Fisheries, ki rangbah shnong bad ki nongïoh jingmyntoi.
Ha kane ka sngi la sam ruh ïa ki symbai dohkha, ka jingbam dohkha, ka shun, ki sboh rep, ki tynrai jingthung kum u kwai, sohtrun bad u riewhadem sha ki nongïoh jingmyntoi ban kyrshan ïa ki kam rep bad kam ri dohkha jong ki.
Haba kren ha ka jingïalang, u Mayralborn Syiem u la ong ba kane ka projek kan long ka jingkyrkhu kaba khraw ïa ki nongrep bad ki nongri dohkha jong ka thaiñ. U la pynpaw ruh ba kane ka sienjam kan kyntiew ïa ka ïoh ka kot jong ki paidbah nongkyndong lyngba ki lad kamai kiba neh slem bad ha kajuh ka por kan pynshlur ruh ïa ka jingïada bad jingïakhun ban sumar ïa ka mariang.
Na ka liang u Project Coordinator ka TRIBES Project, u Manjil Parashar bad ka Fishery Expert ka Kalong-Kapili, ka Aslasha Shraborni, ki la batai ba nalor ka kam ri dohkha, ka projek kan ai jingïarap ruh ha ka jingthung ïa u kwai, riewhadem bad sohtrun ha ki bynta ba marjan bad ki pung dohkha. Ki la ong ba kane ka rukom rep ka long kaba ïadei bad ka mariang bad kan ïarap ban pynneh pynsah ïaka mei mariang ryngkat ka ioh ka kot jong ki nongshong shnong.
La khmih lynti ba ka projek TRIBES kan long kawei na ki sienjam kiba kongsan ban kyntiew ïa ka roi ka par ha ka thaiñ Marngar ha Ri-Bhoi District daka rukom rep ryngkat ki buit thymmai.