Jurip ka MLA ïa ki jaka ha Sumer elaka ban shna surok ban pynïasoh bad ka jylla Assam

Khliehriat Jylliew 06 : Ka MLA jong ka Sutnga Saipung Constituency, ka kong Santa Mary Shylla, mynta ka sngi ka la pynlong ïa ka jingleit jurip sha ki jaka ba hap hapoh Sumer elaka, East Jaiñtia Hills District, halor ka jingthmu ban shna ïa ka surok thymmai ka ban pyniasoh bad ka jylla Assam kaba ha iaid lyngba ka wah Kupli, ha kane ka jingjurip la don lang ruh u Executive Engineer jong ka tnat Public Works Department (PWD), East Jaiñtia Hills District, u bah G. Langstang lem bad ki nongialam shnong kiba na Sutnga,Saipung bad na elaka Sumer.
Na ka liang ka MLA ka la ong ba kane ka jingjurip ka long ban wad na kano ka bynta yn lah ban shna ïa kane ka surok na ka thaiñ Sumer kaba lah ban pyniasoh da kaba suk ïa ka East Jaiñtia Hills District bad ka jylla Assam bad ong ruh ba lada ioh ban shna surok na kane ka thaiñ kan kham pynsuk ïa ka leit ka wan jong ki paidbah ka thaiñ lada ki donkam ban leit sha Assam bad kan iarap ruh ha kaba kyntiew ïa ka khaïi pateng.
Shuh shuh ka la bynrap ba kane ka surok ba ka la pan na ka sorkar kaban pyniasoh bad ka Assam donkam ban shna ruh ïa ka jingkieng na ka wah Kupli, ha ka jingjuip ka MLA ka la ioh ban iakren bad ki briew kiba dei ki nongialam shnong kiba na ka thaiñ Sumer bad pyrshang bad wad jingtip na ki ba kin kdew ïa ka jaka ka ban kham pynsuk ban shna iay kane ka project shna surok ka ban pynsuk ha ka leit ka wan bad ha ka kit ka bah.