Wan jngoh ka Committee on Subordinate na Bihar Legislative Assembly ïa rukom treikam ka Meghalaya Assembly
Shillong, Jylliew 15 : Ka Committee on Subordinate Legislation jong ka Bihar Legislative Assembly ha ka sngi Nyngkong ka la poi ha Shillong ban wan jurip bad ruh ban ïa syllok bad ka Meghalaya Legislative Assembly kum shi bynta jong ka jingwan jngoh sha kane ka jylla.
Ïa kane ka jingïalang ha kane ka sngi la pynïaid da u Lamphang ka Iing Dorbar Thawain ka Meghalaya, u Thomas A. Sangma.
Katba ïa ka kynhun na Bihar la ïalam da u Chairman ka Committee on Subordinate Legislation, u Manohar Prasad Singh ryngkat ki dkhot ba kynthup naduh u Chinmay Atit Singh, Murari Mohan Jha, Pankaj Thakur, Sujit Kumar, Abidur Rahman Aasif. Katba ki ophisar kiba wan lang ki kynthup ïa u Suraj Kumar, Pankaj Kumar Rai, u Shubham Kumar, u Abhishek Kumar bad u Chandan Kumar Jaiswal.
Na ka liang ka Meghalaya, ïa ka Committee on Subordinate Legislation la mihkhmat da u Chairman jong ka, u Bah Gavin Miguel Mylliem, ryngkat bad ki dkhot kiba kynthup ïa u Dr. Mizanur Rahman Kazi bad u Bah Damanbait Lamare.
La donlang ruh ha kane ka sngi naduh u Secretary ka Meghalaya Legislative Assembly, Malthus S. Sangma, bad kiwei pat ki ophisar jong ka Assembly Secretariat.
Haba kren ha kane ka jingïalang, u Lamphang u la ong ba ka Committee on Subordinate Legislation jong ka Bihar ka la wan sha Meghalaya kum shi bynta ban tip shuh shuh bad wan ruh ban jngoh ïa ka Meghalaya Legislative Assembly. U la pynpaw ïa ka jingsngewkmen ban pdiang ïa ka kynhun bad u la ong ba ka jingïakren hapdeng ki ar tylli ki Committee ka long kaba seisoh bad kaba ai jingtip bha.
U Lamphang u la pyntip ba ki dkhot ki la ïakren halor ka rukom treikam jong ki Committee on Subordinate Legislation ha la ki jong ki Legislative Assembly bad ki la ïasam jingmut halor ki rukom thaw aiñ, ki jingïaid lynti kiba bha tam bad ki rukom treikam bapher bapher.
U Lamphang u la bynrap ruh ba ka kynhun na Bihar ka la pynpaw ïa ka jingsngewtynnad ban tip shaphang ka rukom treikam jong ki Committee ha Meghalaya Legislative Assembly bad ka la ai jingïaroh ïa ki rukom treikam ba la bud da ka jylla. U la ong ruh ba ka kynhun na Bihar ka la sngewkmen halor ka jingwan jong ki sha Meghalaya bad ka la shem ba ki jingïakren ki long kiba myntoi bha.