Kan sa poi ka ïa na bynta ka BJP ruh ha Meghalaya thik kumba long ha West Bengal: Thakur

Shillong, Jylliew 15 : U Myntri Khynnah ka Sorkar Pdeng ba peit ïa ka tnat Ports, Shipping and Waterways, u Santanu Thakur ha ka jingwan jong u sha Shillong u la pynpaw ïa ka jingsngewskhem ba ka BJP ka lah ban nang pynkhlaiñ ïa ka nongrim jong ka ha Meghalaya, da kaba kdew ba ka jingkyrshan na ki paidbah ha ki shnong ki thaw ka dang nang kiew katba nang ïaid ka por.
Da kaba kdew ïa ka jingjop kaba ka party ka la ïoh dang shen ha ka elekshon MLA kaba dang shu lah shen ha West Bengal, u Thakur u la ong ba kane ka ïa kan sa poi lang ha Meghalaya ruh ha kawei ka sngi.
Shuh shuh u la ong ruh ba ka jingjop ha ka elekshon kam ju wan mar mar ha baroh ki jylla. “Phin ym lah ban khmih lynti ïa ka jingjop ha baroh ki jaka ha kajuh ka por. Hynrei nga sngewskhem ba ka BJP kan leh bha ha Meghalaya ha ki snem ban wan,” u la ong.
Katkum ka jingong jong u, ki paidbah mynta ki la sdang ban pdiang ïa ki kam kiba leh da ka sorkar u Modi bad dei na kane ka daw ki la sdang ban phai khmat sha ka BJP.
“Ki paidbah ki dang sdang ban sngewthuh ba ka sorkar Modi ka pynurlong ïa ki jingkular. Ynda ki ïohi ïa ki jingmyntoi, kin wan hi sha ka BJP. Ngi dang trei shitom ban pynsngewthuh ïa ki paidbah ba ngi sngewthuh ïa ki jingeh jong ki bad ngin wad lad ban weng ïa ki,” u la ong.
Ha kajuh ka por u la ong ruh ba ki nongtrei party ki la trei shitom bad ki la nang pynkhlaiñ ïa ka jingtreikam ha baroh ki liang. “Ka por jong ka BJP kan sa wan ha Meghalaya, kumba ka la wan ha West Bengal hadien ba ki paidbah ki la sdang ban shaniah ha ka sorkar NDA,” la ong u Thakur.