Hakhmat eh buh ka sorkar pdeng ban ker sainar shiah shilynter khappud ri Bangladesh: MoS

Shillong, Jylliew 15 : U Myntri Khynnah ka Sorkar Pdeng ba peit ïa ka tnat Ports, Shipping and Waterways, u Santanu Thakur, u la ong ba ka sorkar pdeng ka buh hakhmat eh ïa ka jingshngaiñ ha khappud, bad ka Tnat Kam Pohïing ka Ri ka dang trei shitom ban pyndep ïa ka jingker sainar shiah baroh shi lynter ka khappud jong ka India-Bangladesh.
Haba pyntip ïa kane ha ki lad pathai khubor ha Shillong, u Myntri Khynnah u la ong ba ki la don bun ki bynta kiba la dep ban eh bad ha kito ki jaka ba dang sah pat yn sa pyndep noh shen hi.
“Ka Sorkar Pdeng bad ka Tnat Kam Pohïing ka Ri ki shimkhia bha halor ka jingker sainar shiah ha khappud. Ngi la sdang lypa ïa ka jingker sainar shiah ha West Bengal. Na bynta ki jaka ba don ha khappud bad ka Bangladesh kino kino ki bynta ba dang sah na ka liang ka tnad Kampohiing ka Ri kan sa leh ïa kaba donkam,” u la ong.
U Thakur u la pynpaw ruh ba ki don ka jingkyrmen kaba skhem ba kane ka bynta ka la kham biang shibun lada nujor bad ki por ba la dep,” u la ong.