SHILLONG, Jylliew 12: Ka Meghalaya Football Association (MFA) ha ka sngi Thohdieng, 12 tarik Jylliew 2026, ka la pynlong ïa ka jingïalang pynkup burom kyrpang ïa ar ngut ki thei ïalehkai phutbol ka jylla, ka Sanfida Nongrum bad ka Ribansi Jamu, kiba la mihkhmat dang shen ïa ka kynhun India kaba la rah ïa ka nam lahduh ha ka lympung SAFF Women’s Championship 2026.
ïa kane ka jingïalang la pynlong ha MFA Ground, Polo, ha ka jingïadon lang katto katne ngut ki dkhot ba la kham rangbah jong ka synjuk, naduh u President Bah Hamletson Dohling, Vice President bah Cliff Nongrum, Treasurer bah Prosper Warjri, bah Freddy Kharpran Executive Member bad u Chairperson ka Women’s Committee bah Dipshon Ryntathiang. Ki nongïalehkai bad ki nongpynïaid jong ka kynhun kynthei ba la kham rangbah jong ka jylla ruh ki la don ryngkat ha kane ka jingïalang.
Hapoh ka jingthmu jong ka MFA kaba la sdang ha u snem ba la dep, ki nongïalehkai kiba mihkhmat ïa ka India ha ka kyrdan ïalehkai kiba la rangbah kin ïoh ïa ka jingkyrshan pisa kaba T.50,000. ïa kane yn aiti sha ka Sanfida bad ka Ribansi, kiba dei ki kynthei kiba nyngkong eh na ka jylla ban ïalehkai na ka kynhun ba la kham rangbah jong ka ri, ha ka jingïalang kaba kham kyrpang. Hynrei ïa mynta la sam ïa ka khusnam pisa sha baroh arngut hynne ka sngi ryngkat ka memento kum ka jingburom ïa ki ba ki la jop ïa ka SAFF Women’s Championship.
Ka India ka la pynliem noh ïa ka Bangladesh da 3-1 ha ka jingïakhun phainal ha ka sngi Saitjaiñ (06 tarik Jylliew) jong ka taïew ba ladep ban rah ïa ka nam lahduh hadien hynñiew snem.
Ka Sanfida, kaba la mih madan ha ka sien ba nyngkong na ka bynta ka kynhun ba rangbah jong ka ri ha kaba sdang jong une u snem, ka la pynkhihjar ha ka phainal kumjuh ruh ha ka semifinal, kaba la pynlong ïa ka ban khur ïa ka khusnam Most Valuable Player jong kane ka lympung.
Katba ka Ribansi, ka la ïoh ïa ka lad ban mih madan dei ha ka jingïalehkai ba nyngkong pyrshah ïa ka Maldives.
Haba ai jingkren, na ka liang u bah Hamlet-President ka MFA, u la ong ba kine ki arngut kin nym lah ban poi sha ka kynhun ïalehkai ka India khlem ka jingtrei shitom bad ka jingaiti lut. “Ka Meghalaya ka ïaryngkat bad kiwei ki jylla bad kine kine arngut ki la pynshisha ïa kata. Ngi khmih lynti shuh shuh na ki ha ki por ban wan,” u la bynrap.
Ka Sanfida, kaba la pynkhihjar ha ka jingïalehkai ba nyngkong jong ka ha ka AFC Women’s Asian Cup 2026 ha Australia ha u bnai Lber, ka la pynpaw sha kiwei pat ki thei-ïalehkai kiba don lang ha katei ka sngi ba ki dei ban “trei shitom, ban long kiba ïaishah bad pynleit jingmut ha ka thong jong ki. “Phi hap ban tynjuh ïa lade bad ban don ka jingangnud ban kiew shaphrang.”
Nangta ka Ribansi, kaba la kiew kyrdan na ka kynhun U-20 jong ka ri India sha ka kynhun ba la kham rangbah, ka la ïathuh ba ki don shibun ki jingeh bad ki jingtynjuh hynrei ka long pat kaba “kyrpang ban jop ha ka jingïalehkai ba nyngkong jong nga ha ka kynhun ba la kham rangbah.”
