Bym don ba aireng jop suk u James K Sangma ïa ka shuki MP Rajya Sabha

Shillong, Jylliew 11 : U kyrtong monlang jong ka sorkar synrop Meghalaya Democratic Alliance (MDA) ba dei ruh u nongïalam ka National People’s Party (NPP), u James K Sangma ha ka sngi Palei u la ïoh pdiang ïa ka syrnod na u Returning Officer kum u MP ba thymmai ka Jylla sha Rajya Sabha hadien ba u la jop suk khlem da don mano mano ruh ba ïakhun.
Ïa kane ka syrnod la aiti da u Returning Officer ba dei ruh u Secretary ka Meghalaya Legislative Assembly Secretariat u Malthus S Sangma u ba la pynbna ruh ïa ka jingjop jong u James Sangma kum u dkhot ba thymmai jong ka Parliament hadien ba ka por ba la buh ban weng kyrteng ka la kut. Na ka liang u MP ba thymmai ka Meghalaya sha Rajya Sabha haba kren bad ki lad pathai khubor u la pynpaw ka jingsngewnguh ïa ka kynhun synrop baroh khamtam ïa ka party kaba la shaniah ha u ban shimti ïa kane ka shuki. U ong ruh ba ka dei ka jingjop bad ruh ka burom kaba khraw bad kumta un shim da ka jingkitkhlieh ïa kane ka jingshaniah jong ki.
“Ngam lah ban batai ïa ka jingsngewburom kaba nga don namar ba la aiti ha nga ïa kane ka jingkitkhlieh. Ka jingïoh ban mihkhmat ïa ka Meghalaya ha Rajya Sabha ka dei ka kamram kaba khraw, bad ngan pyndep ïa ka da ka jingaiti lut kaba pura,” u la ong.
Da kaba ban jur ïa ka jingdonkam ban pynkhlain ïa ka sur jong ka thaiñ shatei lammihngi ha ka kyrdan ri, u James u la ong ba un trei shitom ban pynthikna ba ki jingeh bad ki jingangnud jong ka Meghalaya bad ka thain Northeast baroh kaewi kin ïoh ïa ka lad kaba kham khraw ha Parliament.
“Namar ba ka jingmihkhmat jong ka Northeast ha Parliament ka dang duna, bunsien ka long kaba eh ban ïoh lad ban rah ïa ki mat jong ka thaiñ. Hynrei da ka jingbteng bad jingïatreilang, ngan pyrshang ban pynthikna ba ka sur jong ka Meghalaya bad ka Northeast kan sawa kham jam ha Rajya Sabha,” u la ong.
Haba batai ïa ki kam kiba hakhmat eh jong u, u James Sangma u la ong ba un buddien da ka jingtrei shitom ïa ki mat kiba kongsan jong ka jylla, kynthup ïa ka jingrung jong ka Ktien Khasi bad Garo ha ka Khyrnit kaba Phra jong ka Riti Synshar ka Ri India bad ka jingpyntreikam ïa ka Inner Line Permit (ILP) ha Meghalaya.
Shuh shuh, u Sangma u la ong ba nalor ka jingrah ïa ki mat ha Rajya Sabha, un treilang bad ka Sorkar Meghalaya bad ki tnad bapher bapher ha New Delhi ban pynurlong ïa ki projek pynroi, ban wad jingïarap na ka sorkar pdeng bad ban pynthikna ïa ka jingpyntreikam kaba bha jong ki skhim sorkar ha jylla.