Nongstoiñ, Jylliew 11: Namar ka jingpynsahteng jong ka sorkar ban pynbeit ïa u pud u sam ha ki jaka kiba hap ha ka Langpih sector mynta ka sngi palei ka 11 tarik Jylliew ki nongïalam ka Synjuk Nongsynshar Shnong Langpih Area ki la leit ban ïakynduh ïa ka Hema Nayak IAS Deputy Commssioner ka West Khasi hills district ban pan jingshai ha kaba ïadei ka jingpynsah teng jong ka sorkar ban pyndep noh ban pynbeit ïa u pud u sam jong ka Langpih sector kumba ki ar sorkar ha ki snem ba la dep ki la dep thung ïa ki Regional Committee on Border Dispute ba kin peit bad khmih bniah ïa ki shnong ki thaw bad ki jaka ki puta kiba hap ha katei ka sector na ka bynta ban pynbeit noh.
U bah Serbilin Lyngdoh bad u bah Sandy Synshiang kiba dei ki nongïalam ka Synjuk haba ïakren bad ki lad pathaikhubor hadien ba ki la mih na kamra trei kam jong ka Deputy Commssioner ki la ong ba ha ka jingleit ïakynduh jong ki ka Deputy Commssioner ka la ong ba haduh mynta kam pat ïoh jingtip ei ei ba kitei ki Regional Committee on Broder Dispute ki don bad kam don jingtip ruh la ki trei kam.
Ha kaba ïadei bad ka jingjubab jong ka Deputy Commssioner kitei ki nongïalam ka synjuk ki la pynpaw ïa mkajinglyngoh kaba khraw namar ha ka jingshisha ki Deputy Commissioner ki dei ki bor pynïaid kiba ha khlieh duh jong ki district hynrei ka sorkar pat kam pyntip satia.
Ha kajuh ka por ki la ong ba ha ki snem ki ar tylli kii sorkar Assam bad Meghalaya ki la dep thung ïa ki Chairman jong ki Regional Committee hynrei kim shym la pyndep ïa ka kamramkab ki dei ban leh.
KItei ki nongïalam ka synjuk ki la ong ruh ba kim kwah shuh ban ïohi ba ki huri ura bad ki jingeh ba bun jait kin dang mih na ka por sha ka por ha ka thaiñ Langpih bad ki da kwah eh ba ka sorkar kan pynkut noh shi syndon halor ka jingïakren pynbeit pud namar lada ïai ap sa katno phew snem ruh imat kan ym don kano kano ka jingsei soh bad kin ym lah hi ruh ban pynbeit ïa u pud u sam.
