Katto katne ki khlur ïalehkai phutbol ba kynsai kiba lah ban mih madan ha ka sien ba khatduh ha ka FIFA World Cup

USA, Jylliew 11: Katba ka FIFA World Cup 2026 ka la sdang hynne ka shiteng miet, ki paid nongkyrshan ha kylleng ka pyrthei kin pynkhreh na ka bynta ki jingïalehkai ki ban sah jingkynmaw bad kiba kyrpang, hynrei nalor ka jingïakhun ban ïoh ïa ka khusnam kaba heh tam jong ka phutbol, kane ka lympung kan sakhi ruh ïa ka jingïalehkai kaba khatduh jong katto katne ki khlur ïalehkai kiba pawnam.
Na ka bynta ki katto katne ki kyrteng kiba pawnam tam jong ka phutbol, kane ka World Cup ka lah ban long ka lynnong ba khatduh jong ki katto katne kiba la ai mynsiem ïa ki million ngut bad kiba la saiñdur ïa ka pateng jong ka phutbol. Don kiba la dep ban rah ïa kane ka khusnam, kiwei pat ki dang ïakhun ban ïoh mad ïa ka jingjop, hynrei baroh kin mih madan da kaba tip ba kane ka lah ban dei kaba khatduh na ka bynta jong ki ha ka lympung ïalehkai kaba khraw tam jong ka pyrthei.
Hangne ki don san ngut ki nongïalehkai phutbol kiba lah ban ïalehkai ïa ka FIFA World Cup kaba khatduh jong ki.
U Lionel Messi (Argentina)
Hadien ba u la pyndep ïa ka jingangnud ba kongsan tam jong ka phutbol da kaba ïalam ïa ka Argentina sha ka nam lahduh jong ka World Cup ha u snem 2022, u Lionel Messi un wanphai biang na ka bynta kaei kaba la khmih lynti ba kan dei ka jingïalehkai ba khatduh jong u ha kane ka lympung.
U Messi, uba la jop 8 sien ïa ka Ballon d’Or, u la pynkut noh ïa ki jingïatai ba la neh da ki phew snem da kaba rah ïa ka khusnam lahduh ha Qatar bad mynta u don ka lad ban ïoh mad sa kawei pat ka jingjop ka ban pynsahnam ha ka histori, kata ka long ban ïarap ïa ka Argentina ban long ka ri kaba nyngkong naduh ka Brazil ha u snem 1962 ban ïada ïa ka burom lahduh jong ka World Cup.
Wat lada ngin nym bishar ïa ka jingïaid lynti jong ka Argentina haduh katno kan poi ha kane ka World Cup mynta u snem, hynrei ym lah ban kyntait ba u Messi u ladep ban pynskhem ïalade kum uwei na ki nongïalehkai ba khraw tam ha ka histori jong ka phutbol.
U Cristiano Ronaldo (Portugal)
Tang khyndiat eh ki nongïalehkai kiba la saiñdur ïalade ban neh slem kumba long u Cristiano Ronaldo. Une u khlur ïalehkai ba pawnam jong ka Portugal u la ïoh mad ïa ka jingim ïalehkai kaba jlan bha na ka bynta ka ri kaba la neh palat arphew snem, bad haduh mynta u dang ïai long u nongïalehkai ba kongsan tam jong ka ri jong u.
Hynrei ka khusnam kaba kongsan kaba dang jah na ka jingim ïalehkai jong u Ronaldo ka sah satang ka World Cup, kaba pynlong ïa u snem 2026 kum ka lad kaba khatduh ban pyndep ïa ka jingangnud ban jop ïa ka khusnam kaba khraw tam jong ka phutbol. Ha ka rta kaba 41 snem, u rung sha kane ka lympung da kaba tip ba man la ka jingïalehkai ka lah ban long kaba khatduh na ka bynta jong u ha ka lympung phutbol jong ka World Cup.
U Luka Modric (Croatia)
U Luka Modric u la long ka shap jong ka jingkiew jong ka Croatia kum ka kynhun kaba khlaiñ bor ha ka phutbol. Naduh ba u la ïalam ïa ka ri jong u sha ka phainal jong u snem 2018 haduh kawei pat ka sienjam ban pyndep ha ka kyrdan ba lai ha u snem 2022, une u rangïalehkai pdeng madan u la bteng ban long u budlum ha ki jingïalehkai ba kongsan na ka bynta ka ri jong u.
Mynta ha ka rta ba 40 snem, u Modric u dang ïai long u nongïalam bad nongïalehkai ba kynsai jong ka Croatia. Ka jingïalehkai kaba khlaiñ mynta u snem 2026 kan long ka jingpynkut kaba kyrpang na bynta uwei na ki nongïalehkai pdeng ba kynsai tam ba ka phutbol ka la sakhi.
U Thomas Muller (Germany)
U nongïalehkai uba la jop ïa ka World Cup ha u snem 2014 bad uwei na ki nongïalehkai ba kynsai jong ka Germany, u Thomas Müller u la tei ïa ka nam ban kiew shaphrang wat hapdeng ki jingeh.
Ka jingshemphang, ka rukom khih bad ka jingtbit jong u ban pynmih ïa ki khyllipmat kiba rai ïa ka jingmih jong ka jingïakhun ka la pynlong ïa u kum u nongïalehkai ba ieit eh ki nongkyrshan la palat shiphew snem. Katba ka Germany ka dang ïakhun ban kurup biang ïa ka jaka jong ka hapdeng ki kynhun ba kynsai tam ha ka phutbol, une u rangïalehkai ba 36 snem ka rta, un kyrmen ban pynkut da kawei ka jingïalehkai kaba khatduh kaba sah jingkynmaw.
U Neymar (Brazil)
U Neymar, u rangïalehkai ba shakhmat jong ka Brazil, u la dep pynpaw ba ka FIFA World Cup 2026, kan dei kaba khatduh eh ha ka jingim jong u. Une u rangïalehkai ba 34 snem ka rta, u la pynpaw ïa kane halor ka jingthoh ha ka social media na ka FIFA kaba pyni ïa ki dur jong ka jingïalehkai jong u Neymar ryngkat bad ki kyntien “Ngi la peit ïa u ba u la san.” “Ka jingïalehkai kaba khatduh,” la jubab une u rangïalehkai ka Santos ha ka comments section.
U Neymar, u nongïalehkai ba bun kol tam jong ka Brazil, da kaba thep 79 kol ha ki 128 tylli ki jingïalehkai, um shym la ïalehkai na ka bynta ka Brazil naduh ba u la mynsaw ha u bnai Risaw jong u snem 2023. Hynrei, u la shah pynrung ha ka kynhun bad un kyrmen ban pynkylla ïa kiei kiei na ka bynta ka Brazil, kaba dang ïakhun ban rah ïa ka nam lahduh kaba hynriew ha ka FIFA World Cup hadien 24 snem.