Kim ong ‘Hooid lane Em’ watla phriang ki khubor ba kin leit pynïasoh BJP: Genl. Secy. UDP

Shillong, Nailur 10 : U General Secretary ka United Democratic Party (UDP), u Bah Titosstarwell Chyne ha ka sngi Palei u la ïathuh ba ki MLA ka party haduh mynta kim pat kren ei ei watla ki khubor kiba la phriang kylleng ka ri ki la kam ba don na ki MLA ka party kiba la thmu ban mih noh na ka party bad leit pynïasoh sha ka BJP.
Haba kren bad ki lad pathai khubor, u Nongïalam ka UDP u la ong, “Haduh mynta kim kyntait bad kim pynthikna la kadei shisha ne em ba ki thmu kumta.”
Nangta u la ïathuh ruh ba na ka por sha ka por u la kynduh bad ïa kren bunsien bad baroh ki MLA ka party, tangba kim kren shai ba kin phet sha kiwei pat ki seng. “Tad haduh mynta ka party kam pat ïoh ïa ka jingpyntip na ki MLA halor kane ka bynta”.
Shuh shuh u la ong ba lada ki sngew ba ki nongïalam kum u President ne General Secretary ki dei ka daw bad ki long ki bym biang ban bat ïa ka kam, u kloi ban shim ïa ka jingkitkhlieh da kaba hiar shuki bad ban ong ruh ïa u Bah Metbah Lyngdoh ban hïar shuki noh na ka kam President.
Halor ka jingkylli, u Bah Titos u la ong ba lada peit ïa ka history, ka jingphet seng bad rung seng ki MLA kam dei shuh kaba phylla, hynrei kaba sngewsih ka long ba na ka seng riewlum kin leit sha ki National Party, da kaba kdew ruh ïa ka jingïapait ha ki seng riewlum ha ki por mynshwa bad ki leit rung pat sha kiwei ki seng riewlum.
“Haba ngi don khnang ha ka party riewlum ka long ban pynneh pynsah ïa ki seng riewlum bad ïada ïa ka jinglong kyrpang jong ka jaidbynriew ba rit paid. Hynrei haba wan mynta ban don bynta ha ka jingpyllait ïa ka history jong i Bah BB Lyngdoh, nga kynmaw ïa ka kyntien jong i kaba i ong ba lada, ‘Phi jngi ha ka duriaw kaba heh phi lah ban ngam jyllop. Hynrei ha ka pung kaba rit lada long kumno kumno ruh phi lah ban ïada ïalade'”
U Bah Titos u la ong ruh ba ka jingkren jong u Bah BB Lyngdoh ka pynkynmaw ïa ka phang kaba ïadei hapdeng ki party riewlum bad ki party heh ha ka ri ne National Party.
“Ngam tip haduh katno kita ki mat jong ka National Party kiba lah ban ïada ïangi ki rit paid hynrei haduh mynta ngi khih ngi ksaid bad ngi ïa tyllun bad ngi ïohi ïa ka jingkhih jinglynga jong ki khun samla jongngi kumno ban ïada ïa ka jaidbynriew jongngi kaba rit ïoh ngi shah tyllep noh ha ki bor kiba nabar.”