Shillong, Nailur 10 : Hapdeng ki khubor ba 9 na ki 12 ngut ki MLA ki don jingthmu ban leit pynïasoh noh sha ka BJP, ka United Democratic Party (UDP) ha ka Sngi Palei ka la pynpaw ba ka jingkhang jong ka party ka long kaba plie beit ban ïakren bad ka kloi ruh ban bujli nongïalam lada donkam.
U General Secretary ka UDP Bah Titosstarwell Chyne ula ong ba ka party haduh mynta kam pat ïoh satia ïa kano kano ka khubor halor ka jingphet seng. “Ym pat wan satia kano kano ka shithi ne ka jingai jingtip na kino kino ki MLA haduh mynta” ula ong.
U la ïathuh ba ki jingpyrshang jong u ban ïoh ïa ki jingshai na ki MLA kam pat seisoh satia haduh mynta.“Nga la ïakynduh bad phone ïa ki la bunsien. Kim shym la kren shai satia. Kim shym la pynthikna lane kyntait ïa ka jingthmu kynthih sha ka BJP” ong u Bah Titos.
Haba kylli hato dei ban kynnoh ïa u President u Bah Metbah Lyngdoh ba kine kiei kiei baroh kila wan jia, u Bah Titos ula ong “Ka long kaba suk ban kynnoh. Lada ka don ka jingbym hun ïa nga lane ïa u President, dei ban kren beit da kaba shai. Kine ki kam kim dei ki nongkynti shimet. Ka dei na ka bynta ka party. Lada ngi dei ka daw ba ki kwah ban mih seng, ngi long kiba kloi ban hiar shuki ban pynkhlaiñ ïa ka party”.
U ïathuh ba ka UDP kan pynlong ïa ka jingïalang ba kyrkieh jong ka CEC ha ka Sngi Thohdieng, kaba dei ruh ka sngi rakhe ïa ka sngi seng ïa ka Party ne foundation day. “Ngi la khot ïa baroh ki MLA, MDC bad ki dkhot ka CEC” ula ong.
Haba kylli la ka dei ka jingbujli shuki Myntri kaba pynmih ïa kine ki kynrum kynram, u Bah Titos ula ong “Ngam tip ïa kata. Kane ka dei shabar ka jingtip jong nga bad ka dei ka rai u Myntri Rangbah”.
