Mawkyrwat, Nailur 10: Ka Centre for Youth Development (CYD), Mawkyrwat lyngba ka jingkyrshan jong ka Tourism Department, Sorkar Meghalaya, kan sa pynlong ïa ka IV Mawkyrwat Great Marathon ha ka 26 tarik ‘Nailur, 2026, da ka jingthmu ban kyntiew ïa ki kam jingïalehkai, ka koit ka khiah bad ban pynshlur ïa ki samla ban shim bynta kham bun ha ki kam jingïalehkai hapoh ka South West Khasi Hills District.
Ka jingïakop kan long ha ki saw tylli ki kyrdan, kata: ki shynrang kiba la palat 18 snem, ki kynthei kiba la palat 18 snem, ki khynnah shynrang kiba hapoh 18 snem bad ki khynnah kynthei kiba hapoh 18 snem. Ha kaba ia kine yn sa phiah ha la ki jong ki jong ki lynti ba ki dei ban mareh.
Ha kane ka jingïakop yn sa sam ruh ïa ki khusnam sha kiba jop ha man la kawei pa kawei ka kyrdan, ryngkat bad ki consolation prizes ïa ki nongshimbynta kiba wan ha ka kyrdan kaba 4 haduh kaba 10.
Nalorkata, yn sam ruh ïa ki khusnam kyrpang sha u ne ka nongmareh uba la tymmen tam bad uba khynnah tam napdeng kiba shim bynta ha ka marathon, kaba pynshlur bad ai mynsiem ïa ki.
Kane ka marathon kan sa sdang na Maharam Government Higher Secondary School, Mawkyrwat, bad baroh kiba ïashimbynta ki dei ban poi ha ka por 5:30 mynstep ha ka 26 tarik u ‘Nailur, 2026. Ka bai registration ka long ? 100, kaba lah ban siew lyngba ka QR Code, bad ki nongkwah ban shimbynta ki dei ban register noh shuwa lane ha ka 21 tarik Nailur, 2026.
