Nongpoh, Nailur 10: Ka Pahammawleiñ SC kala long ka lahduh jong ka lympung ïalehkai phutbol ban pynsahnam ïa u Dr DD Lapang bala ai kyrteng kum ka Dr DD Lapang Memorial Trophy FT hadien ba kala lah ban pynliem noh ïaka Umsaitsning SC haka jingïakhun phainal kaba la long mynta ka sngi ha madan Artificial Turf ha Umbuda.
Ïa kane ka lympung la wan ban pynhap pyrda noh mynta ka sngi da u Bah Wailadmiki Shylla Myntri ka tnad ïalehkai ka sorkar jylla kum u kongsan haka jingdonlang u Bah Mayral Born Syiem MLA ka Nongpoh kum u symbud kongsan, u Bah Damanbait Lamare MLA ka Umroi, ki nongïalam ka RBDSA, ki khun ki kti lem bad ka iing ka sem jong u Dr DD Lapang, ki nongïalam shnong, ki riew rangbah naka them Ri-Bhoi bad kiwei kiwei.
Haba phai sha ka jingïakhun phainal ha kane ka sngi, hapdeng ka Pahammawleiñ SC pyrshah ïaka Umsaitsning SC ka jingïakhun kala long kaba ïakhaid bad shongshit da ka jingsakhi lang ki spah ngut ki paidbah nongkyrshan, hynrei naduh ba sdang ka kylla step haduh ba kut ka kylla miet ym shym don satia ba ioh pynkhih ïaka jar ha kaba ki bor pynïaid kila rai ban pynïashut noh da ka tie-breaker, bad dei haka jingïashut tie breaker ka Pahammawleiñ SC kala lah ban pynliem noh ïaka Umsaitsning SC da 4-2 kol ban rah syndon ïaka nam lahduh jong kane ka lympung.
Naka liang ki bor pynïaid kila sam ruh ïaki khusnam bapher bapher kynthup ki khusnam shimet bad ka kynhun Pahammawleiñ SC kaba long ka lahduh kala ioh rah ïaka song pisa kaba T.1Lakh lem bad ka trophy katba ka Umsaitsning SC kaba la rem noh haka jingïakhun phainal kala ioh ban rong ïaka song pisa kaba T.50 hajar lem bad ka trophy.
