Jowai, Nailur 10: Ka Mainroad SC Wahiajer bad ka Mukhla Sohshrieh SC ki la jop ïa la ki jong ki jingïakhun ha ka lympung (L) Joybell Suiam Memorial Football League 2026 ha ka kyrdan Second Division bala pynïaid da ka Thadlaskieñ Sport Association, ba la long hynne ka sngi Palei (10 tarik u Nailur, 2026) ha madan Wahiajer Multi Sports Complex Stadium.
Ha ka jingïakhun kaba nyngkong, u Chilangmitre Laloo (14, 58 & 60’) u la thep hat trick ban ïarap ïa ka Mainroad SC Wahiajer ba kan pynliem da 3-2 kol ïaka Maya SC Wahiajer. Ki ar kol jong ka Maya SC la thep da u Iaid Pale (28’) bad u Bunki Lyngdoh (68’).
Nangta ha ka jingïalehkai kaba bud, ka Mukhla Sohshrieh SC kala pynkhihjar lai sien ha ka kylla miet ban wanphai na ka shi kol ban pynliem da 3-1 kol ïaka Tympang SC Wahiajer. U Elbious Sari (63’), u Odawan Lyngdoh (67’) bad u Aimson Sari (69’) ki la pynkhihjar na ka bynta ka Mukhla Sohshrieh. Ka Tympang SC Wahiajer ka la lamkhmat shipor lyngba ka kol jong u Pynsuk Shylla (27’).
Katba haka jingïakhun kaba lai hapdeng ka Good will Mupliang bad ka RC Dreaming Mupliang ka la kut ha ka jingïakhaid, khlem don ba lah ban pynkhihjar (0-0).
La pyntip ka jingïakhun ha kane ka sngi Thohdieng (11/09/2026) ki long: Por 10 baje mynstep ka Lumkhudung SC pyrshah ïaka United SC; Por 12 baje mynsngi ka Ryntih Mynsngat pyrshah ïaka Mukhla Veterans; Por 2 baje nohphai sngi ka Rakabah Hunlang pyrshah ïaka Namdong Christian Club.
