Lada ka sorkar ka duna pisa ngi kloi ban sei lang, pynpaw ki nongñiah trok ba la shem jingeh palat

Nongpoh, Nailur 09: U Deputy Commissioner ka Ri-Bhoi mynta ka sngi u la khot jingïalang ïaka kynhun jong ka Meghalaya Commercial Truck Owners and Drivers Association (MCTODA) hadien ba kum ka kynhun ki trai bad ki nongñiah trok kila shem jingeh shaba palat haba rung sha Ri-Bhoi District namar ka jingbym don ki jaka ieng ba biang jong ki trok ne ki lay-by, namar ka jingpyrkhing ïaki kali heh ban ieng harud surok naka bynta ka jingshngaiñ ki paidbah ba leit ba wan.
Ïa kane ka jingïalang la pynlong ha DRDA Conference Hall haka jingdonlang naduh u Dr Abhishek Saini Deputy Commissioner, ki ADC, ki ophisar naka tnad Transport, PWD, pulit, NHAI, NHIDCL bad kumjuh ruh ka District Road Safety Committee ka Kamrup bad kiwei kiwei.
Haba kren sha ki lad pathai khubor u Bah Mosklandar Marngar Chairman ka MCTODA u la ong ba naka liang u DC u la khot ïaki namar ka jingeh kaba kila mad haba ïadei bad ki jaka ieng ha shilynter ka Ri-Bhoi District, namar ki nongñiah trok shisien ba kila rung sha Ri-Bhoi kila khia jingmut namar ba kim ioh jaka ieng shuh, watla don ka jingthud haka kali, ki pang, ki samthiah namar bala don ka aiñ kaba la khang pyrshah ïaki ban ieng harud surok.
U la ong ruh ba ka jingpyntreikam ïa kane ka aiñ ka long ban pynduna ïaki jingjia aksiden hynrei ka jingpyrkhing ïaki trok ban ieng kala nang pynjur shuh shuh ïaki jingjia aksiden namar kane kala ktah ïaki nongñiah trok namar ki ñiah da ka jingtieng bad ka jingjynjar bad teng teng wat lada ka met jong ki kla thaid ruh ki hap ban bteng beit ban ñiah namar da ieng ruh kin sa shah pynshitom bad shah rah haki pulit ryngkat ka kuna.
U la ong ruh ba kane kadei ka kam iap kam im bad hadien ba ka kynhun kala pynsngew ïaki jingeh naka liang ki bor ba dei peit kila sngewkhia shisha bad ha kane ka jingïalang la ioh ban ïakren shibun ki mat bad la rai ruh ban pynlong da ka jingjurip lang ryngkat bad ki nongïalam ka MCTODA ïaki jaka ban lah ban pynlong kum ka jaka ieng ki trok kham kloi, namar ka lay-by ka dei ban don haba shna ïaki surok National Highway bad ngi khmih lynti ba kane kan urlong noh shen, namar ka dei shisha kaba donkam bad lada ka sorkar ka duna pisa ruh naka liang ka kynhun ka kloi ban snohkti lang naka pisa seng ban ïarap kum ka bai tih JCB namar ka kam kam shah shuh ban dang ap slem.