Shillong, Nailur 10: Ka Shillong Premier League 2026 ka la wanrah sa kawei pat ka jingïakhun kaba itynnad ha kaba ka Rangdajied United ka la wanphai na ka shi kol ha ka kylla miet ban pynliem ïa ka Laitkor da 3-1 hynne ka sngi Palei ha madan First Ground-SSA Stadium. Kane kadei ruh ka jingjop kaba nyngkong na ka bynta ka RUFC ha kane ka samoi SPL 2026.
U Hamingbert Nongbet (32’) u la pynkhihjar nyngkong na ka bynta ka Laitkor shuwa ba ka Rangdajied kan wanphai da kaba tyngeh ha ka kylla miet ban pynkhihjar lai sien lyngba u Franky Dkhar (53’), u Mebannangkiew Thabah (73’) bad u Pasborlang Khonglikong (88’).
Shuwa kane ka jingïakhun, ka RUFC ka la pynkhihjar ha baroh lai tylli ki jingïalehkai ba la dep jong ka hynrei kam pat jop wat tang shi sien bad ka dang kamai tang 1 poiñ ha ka miej, katba ka Laitkor pat ka tam da shi kyrdan da 3 poiñ ïa ka RUFC. Kane ka jingjop ka mut ba ka Rangdajied ka la lait sah ha ka thup shah sloit lane ka relegation zone bad ka la kiew sha ka kyrdan ba hynñiew, kaba la pynhap ïa ka Nongkseh sha ka kyrdan kaba phra bad ka Laitkor sha ka kyrdan kaba khyndai.
Shiteng kynta ha ka kylla step dei ka Laitkor kaba la ïohlad ban pynmih katto katne ki kabu ksiar ban pynkhihjar, kynthup ïa ka jingpyrshang jong u Samuel Suting, Hamingbert bad u Shanborlang Nonglait, ki bym shym la seisoh.
Khatduh ka Laitkor ka la pynïakhlad ïa ka jingïakhun ha ka minit kaba 32 hadien ba u Hamingbert u la pynkhihjar na ka bol pashat jong u Samborwell Mynsong.
Na ka bynta ka Rangdajied, ka kabu kaba bha tam ka la wan na u Elnathan D Wahlang, kaba la lait sharud, bad ka jingpyrshang jong u Freelyson Tariang, kaba la shah khanglad ha u rangap kol ka Laitkor u Deranius Wahlang.
Nangta ha ka kylla miet, ka jingbakla jong u Deranius kala plielad ïa ka Randajied ban pynïakhaid na ka free kick jong u Franky; hadien ba une u nongap kol u la kam bun palat ka kjat ryngkat ka bol shabar ka phyllaw kol (box) katba u dang pyrshang ban shut ïa ka bol sha jngai.
Hadien 20 minit thik, ka Rangdajied, kaba la bteng ban tur shakhmat hadien ba ïoh pynïakhaid, ka la ïoh ba kan lamkhmat ïa ka jingïakhun lyngba u Mebannangkiew shuwa ba u Pasborlang un pynskhem ïa ka jingjop da kaba thep ïa ka kol kaba lai ha ki minit ba khatduh.
Mynta ka sngi ka Nongkseh kan aireng pyrshah ïa ka Meghalaya Police ha ka por 3:30 baje nohphai sngi. Baroh ar tylli ki kynhun ki la kiew sha ka SPL na ka First Division ha u snem ba la dep. Katba ka Nongkseh ka la rah ïa ka nam lahduh jong ka 1st Division 2025, hynrei ka la mad pat ïa ka jingsdang kaba jwat ha ka SPL bad ka wan shadien ka MLP ha ka miej kamai point.
