Shillong, Jylliew 9: Ki nongialam ka National People Party na lai tylli ki Block kila pyntip ba ha ka janmiet 8 tarik u Myntri Rangbah ka jylla u Conrad K Sangma u la ai ka jingkular bad pyntikna sha ki ba un pynkut noh ïa ka jingsam bording ka SAI Computer ha Mawsynram Division jong ka tnad MeECL.
Halor kane ka mat kaba la ktah ym tang ïa ki paidbah ka Mawsynram Constituency, hynrei kala ktah ruh ïa paidbah ka Mawphlang bad Ranikor Constituency namar naduh ba shimti ka SAI Computer ban sam bording ha Mawsynram Division ki paidbah kila mad jingeh namar ka jingkiew palat ka bai bording.
Halor kane, ki nongialam ka NPP na kine ki lai tylli ki Block ha ka 5 tarik mynta u bnai kila dep ban kynduh ïa u Conrad K Sangma bad pynsngew ïa kane ka jingeh ba ki paidbah kila kynduh jingeh ba khraw.
Haba kren sha ki lad pathai khubor u Bah Himalaya M Shangpliang u la ong, da ka jingbuddien jong ki nongïalam ka party NPP na ki lai tylli ki Block bad ngi la kynduh ïa u Conrad ban buh ka jingdawa ban weng noh shi syndon SAI Computer Ltd kaba dei peit ïa ka bording ha ka thain jong ngi.
“Ngi la ioh ban buddien biang hynnin ka janmiet bad hadien ba ngi la ia kynduh ha ïing jong u ha ka 5 tarik ha kaba u la ong ba u dang peit bniah ïa kane ka kam ba ha kano ka dur ba un pdiang ïa ka jingdawa jong ngi” ong u Bah Shangpliang.
Shuh shuh u la ong, “Hynnin janmiet ka kynhun kala kynduh biang ïa u Myntri Rangbah bad u Conrad u la mynjur ban weng noh shisyndon ïa ka contract bad jong ka SAI bad ngi ngeit ba ka kam ban pynkut noh ka dang ïaid shaid shaid bad hapoh ki khyndiat sngi lehse kan sa poi ka order ba ka SAI kadei ban mih noh na ka thain Mawsynram”.
Na ka liang u Bah Alvin Sawkmie uba dei u MDC ka Mawsynram u la ai khublei ïa u Myntri Rangbah hadien ba kila ioh ban kynduh ha ïing sah jong u bad ka khubor ba sngewtynnad ka long ba u la ai ka jingkular ba na ka liang jong u ba ïa kane ka SAI Computer Ltd kumba long mynta hap ban pynduh pyndam noh na kine ki lai tylli ki Block.
U Bah Alvin u la ong, “Kane baroh ka hap hapoh Mawsynram Division jong ka tnad MeECL, kumta la kyrpad ïa ki paidbah ba kin shu ïai shah ha kine ki khyndiat sngi hi namar ba na ka liang ka sorkar kala shim khia hadien ka jingioh sngew ïa ka jingud jingnam jong ki paidbah bad sorkar ha kane ki khyndiat sngi kan leh ban pynduh noh ïa ka SAI”.
