Nongstoiñ, Jylliew 09: Ha kine ki sngi ki kam tuh kam thiem ki la kynrei haduh katta katta ym tang ha ki jaka sor hynrei haduh ki jaka nongkyndong ruh. Kumba ka long ha ki snem ba la dep baroh ka thaiñ Langpih wat la ka dei ka jaka kaba ki huri hura ki jia khah khah hynrei ki kam tuh kam thiem pat kim da kham don koit hynrei ha kine ki sngi ki nongshong shnong katei ka thaiñ ki la hap ban peitngor bha namar ki nongtuh masi ki la sdang ban tur sha katei ka thaiñ.
Ha kaba ïadei bad ka jingsdang tur jong ki nongtuh masi ha katei ka thaiñ u bah Trasdingland Nonglang sordar jong ka shnong Mawsikar haba ïakren bad u nongthohkhubor jong u Mawphor u la ïathuh ba dang ha kane ka taïew ba la dep ka la jia ka jingshah tuh masi na katei ka shnong bad haba ki trai masi ki la leit ban pyntip ha u sordar shnong ki la pynlong ïa ka jingtohkit bniah bad la ïoh jingtip ba ki don ki briew ki bym dei na katei ka shnong kiba wan swait ha ka por mynsngi bad kiba kham ishan khmat ruh ïa ka ïaid ka ïeng jong ki.
Kumta ki nongshong shnong ki la buddien bha bad ki la ïoh ban bat ïa arngut ki briew bad ki la rah sha ïng dorbar ban pynlong ka jingtohkit.
U bah Nonglang u la ïathuh ruh ba ka jingtohkit ïa kitei ki briew ka la neh baroh shi miet namar ba kim treh ban phla ïa ka jingshisha. U la ïathuh ruh ba dei tad haduh ka por kynjatshai ba ki paidbah ki la byrngem tyngeh ba lada kim ïathuh kin pynshitom da kaba tyngeh ha kaba ki la hap ban phla ïa kaei kaba ki ka leh.
La ong ruh ba hadien ba ki la phla ki paidbah shnong ki la phah ïalam shaduh ka jaka ba ki teh ïa ki masi bad la ïoh ban pynphai biang ïa kitei ki masi sha ki trai. Ha ba kylli la ki leit aiti ne em ha ki pulit u bah Nonglang u la ong ba namar ba la ïoh biang ïa ki masi ka dorbar shnong kam shym la leit ati satia ha ki pulit hynrei na ka liang ki paidbah ki la shu daiñ kuna ïa ki katkum ki kyndon ba la buh da ka dorbar shnong bad la pyllait noh. Nalor kata u bah Nonglang u la kyntu ruh ïa ki paidbah nongshong shnong ka thaiñ Langpih ba ki dei ban peitngor bha bad lada ki lap ïa kino kino ki briew kiba kham ishan khmat kiba wan sha katei ka thaiñ khlem kino kino ki kam ki dei ban peitngor bha ïoh lehse ki dei pynban ki nongwan swait ban ïoh tuh ïoh thiem.
