Rai ka NPP ban kyntu ïa ka sorkar pdeng ban khot jingïalang ïasyllok

Shillong, Jylliew 9 : Ka National People’s Party (NPP), hapoh ka jingïalam u National President u Conrad K Sangma, ka la pynlong ïa ka jingialangjong ka National Executive Committee bad ka Annual General Meeting (AGM) ha Orchid Resort, Mawkasiang, New Shillong Township ha ka 8 tarik ka Lah Sngi U Blei. Ha kane ka jingialang kawei na ki mat ba kongsan ba ka NPP ka la rai ka long ban kyntu ia ka sorkar pdeng ba ka dei ban khot da ka jingialang ban iasyllok jingmut lang shwa ban wanrah ka jingpynkylla ha ka Foreign Contribution (Regulation) Amendment Bill, 2026 (FCRA Bill 2026)
Ka jingïalang jong ka National Executive Committee, ka shnat treikam ba halor duh ha ka kam shim rai jong ka party, la ïashim bynta da ki nongïalam kiba la rangbah, ki nongkitkam, ki MLA na Meghalaya, Manipur bad Nagaland. Ka jingïakren ba la pynleit jingmut bha ka long halor ka lynti ïaid ha ka saiñ pyrthei, ka jingpynkhlaiñ ïa ka seng, bad ki buit ïakhun ïa ki elekshon ban wan ha kylleng ki Jylla ka thaiñ Shatei Lam Mihngi bad shabar.
Ha ka jingïalang ka AGM, ka party ka la shim ïa katto katne ki rai kiba thmu ban pynkhlaiñ ïa ka jingïashim bynta ha ka synshar khadar paidbah, ban kyntiew ïa ka jingsuk bad ka jingïasuk ha NE, ïada ka hok ki trai muluk bad pynsted ïa ka roi ka par ba kdup lang ïa baroh hapoh ka thong jong ka “Northeast 2047 Vision: Gateway to Prosperity”.
Ka mat ba kongsan jong ka AGM ka long ka jingshim rai ban wanrah ïa ka jingtreikam kaba shai, ka jingtrei da kaba buh ïa ka por, bad ka jingïasyllok halor ka FCRA, pynbiang tarajur ïa ki jingsngewkhia halor ka jingshngaiñ ka Ri bad ka jingdonkam ban ai mynsiem ïa ki seng trei mon sngewbha ba kin shakri khambha ïa ka imlang sahlang, khamtam ha ki thaiñ ki ba shah ïeh beiñ.
Ka AGM ka pynskhem biang ruh ïa ka jingkut jingmut jong ka party ban • Pynkhlaiñ ïa ka jinglong nongïalam hapdeng ki samla bad ki kynthei • Wanrah ïa ka roi ka par kaba neh bad ba ïoh bynta lang mar katjuh • Pynkhlaiñ ïa ka jingïatreilang hapdeng ki Jylla hapoh ka thaiñ Shatei Lam Mihngi • Pynïar ïa ka ktem jong ka Party ha kylleng ka ri India da ka jingphai khmat halor ka synshar khadar kaba don akor bad ba don jingkit khlieh
U Conrad K Sangma, National President ka NPP ula ong, “Ka rai kaba shim mynta ka sngi ka pyni ïa ka jingkut jingmut jong ngi sha ka synshar khadar kaba buh nyngkong eh ïa u paidbah hakhmat. Man ki rai ba ngi shim ka dei ban ïalam da kawei ka nongrim, la kan ai jingmyntoi ne em ïa ki paidbah. Kane ka dei ka nongrim jong ka thong bad ka jingkiew shaphrang ka party.
Halor ka bynta jong ka thaiñ Shatei Lam Mihngi ha ka jingkiew shaphrang ka Ri ha ka roi ka par, ula bynrap “Ka thaiñ Shatei Lam Mihngi ka long kongsan bha na ka bynta ka lawei ka India. Da ki policy kiba dei bad ka roi ka par ba kynthup lang ïa baroh, ka thaiñ ka lah ban long kum ka khyrdop sha ka roi ka par bad ka jingkiew shaphrang na ka bynta ka ri baroh kawei”.
Haba kren ia ki jinglong jingman ka saiñ pyrthei mynta, ula kynthoh “Wat hapdeng ki jingeh, khamtam ha ki Jylla kum ka Manipur, ngi ïohi ïa ka kabu ban pynkhlaiñ ïa ka jingdon jong ngi ha ka Jylla. Ngi la aiti lut ban ïatrei ha ki shnong ki thaw bad ïakren bad ki paidbah ban wanrah ïa ka jingjai jai, ka roi ka par bad ka jingmihkhmat”.
Halor ka jingkiew shaphrang ka Party, ula ong “Ka jingnang kiew ka jingïashim bynta na ki Jylla ha kylleng ka Ri ka pyni ïa ka jingnang kiew ka jingshaniah ki briew ha ka NPP. Ngi sngew skhem ban pynïar ïa ki dienjat jong ngi shabar jong ka thaiñ Shatei Lam Mihngi ha ki snem ban wan”.
Ka party kala shong bishar ruh ïa ki jingpynkhreh ïa ki elekshon bad ki jingïakren kam saiñ hima sima ki ban wan kynthup:
•Ka elekshon shiteng samoi ka Lok Sabha ha Meghalaya, kaba ka NPP kala pynïeng ïa u kyrtong uba khlaiñ. • Ka elekshon kaba la khmih lynti ban long jong ka Garo Hills Autonomous District Council • Ka jingpynkhreh ïa ka elekshon Assembly ha Manipur, da ka jingpynleit jingmut ban pynkhlaiñ ïa ka jingrung khlieh ka party ha ki shnong ki thaw.
U National President ula ban jur ïa ka jingdonkam ban pynbun ïa ki jingïakren ha Manipur bad pynshlur ïa ka jingleit ïuhkjat man ka por da ki nongïalam ka party ban pynkhlaiñ ïa ka seng bad ai mynsiem ïa ki nongkitkam.
Ka jingïalang ka la kut da ka kyntien ai khublei, kaba ithuh ïa ka jingtrei shitom jong ki nongïalam ka party, ki nongkitkam bad ki dkhot namar ka jinglah ban pynlong ïa ka jingïalang kaba jop bad noh synniang sha ka jingnang kiew suki pa suki jong ka party.
Haba pynskhem biang ïa ka motto jong ka “One Voice, One Northeast.”, ka NPP ka pynpaw ïa ka jingsngewskhem ha ka jingpynbteng ïa ka lynti ïaid ha ka roi ka par bad ka jingshakri ïa ka Ri.
Kiwei pat ki mat ba ïakren ha kane ka jingïalang ki kynthup ïa ka jingai jingbatai ba bniah halor ka Uniform Civil Code da ka MLA bad National Secretary Dr Ampareen Lyngdoh. Ka jingai jingbatai halor ka jingphaidien biang ïa ka Article 371 ha ka thain Shatei Lam Mihngi ba la ai jingkren da u MLA ka Manipur M Rameshwar Singh.