Jowai, Naitung 19: Ka jingïalehkai phutbol ‘5th Debo Shullai Memorial Trophy’ 2nd Division Football League Cum Knockout Tournament-2022 bala pynïaid da ka West Jaiñtia District Sports Association (WJDSA) kaba la long mynta ka sngi iñ ha madan Kiang Nangbah Stadium Jowai.
Haba phai sha ka jingïakhun kaba la long hapdeng ka Panaliar pyrshah ïa ka Iawmulong Nartiang, kala poi noh sha ka jingïakhaid da mar 1-1 kol. Ïa ka kol ba nyngkong la thep shwa da ka Iawmulong Nartiang ha ka minit ba 39 da u rangïalehkai jong ka u Dawyoo Shadap.
Katba ïa katei ka shikol la lah ban pynphai kylla da ka Panaliar lyngba u Obram Sumer ha ka minit kaba 61 jong ka kylla miet, haduh ba kut jong ka jingïakhun kala neh da mar shikol.
Ka jingïalehkai lashai ka sngi 20 tarik kan long hapdeng ka Caroline Colony pyrshah ïa ka Pynthorlangteiñ ha ka por 3 baje nohphai sngi.