Shah tuh pisa ka dukan die dawai mrad ha Tura, lyngba ka CCTV ïoh ringdur ïa ki suba donkti

Tura, Jylliew 6: Ki pulit ki la sdang ïa ka jingtohkit halor ka jingshah tuh ha kawei ka dukan die dawai mrad ha ka thaiñ Brahminpara jong ka Tura hadien ba ki briew ki bym lah ban ithuh la kynnoh ba ki la tuh pisa na katei ka jaka ha ka sngi Palei.
Kane ka jingjia ka la jia ha Sen Pharma, ka jaka die dawai jong ki mrad (veterinary pharmacy), ha kaba la shim ïa ka pisa napoh ka synduk pisa jong katei ka dukan. Ki dur CCTV na katei ka jaka ki la ioh ring dur ïa arngut ki briew kiba la suba bad ki dang shah eksamin ha ki nongtohkit.
U trai dukan u la ujor da ka ejahar sha ki pulit, kiba naduh katei ka por ki la sdang ban tohkit bad ki dang bishar bniah ïa ki dur na ka kor CCTV kiba don bad kiwei kiwei ki sakhi ban lap ïa kiba donkti.
Ki video bad ki dur jong ki nongtuh ba la suba ruh ki la saphriang ha ki social media bad ki jaka pyntip paidbah, kaba la pynlong ïa ki nongshong shnong ban ïarap ïa ki bor pynïaid da kino kino ki jingtip kiba lah ban ïarap ban lap ïa ki runar.
Ki pulit ki la ïathuh ba ka jingpyrshang ka dang iaid shakhmat ban lap bad kem ïa ki nongshah kynnoh.Ki heh ophisar ki la kyrpad ïa ki paidbah ba kin wan shakhmat bad kino kino ki jingtip kiba ïadei kiba lah ban iarap ïa ka jingtohkit.
Katei ka jingtuh, ka la mih ïa ka jingsngewkhia ïa ki nongshong shnong bad ki trai kam ha Brahminpara, ha kaba kiba bun, ki la pyrta ban pynjur ïa ka jingpahara bad ban kham pyrkhing ïa ki lad jingiada.Ki bor pyniaid district ki la ai jingmut ïa ki trai dukan bad ki nongshong shnong ba kin pynskhem bha ïa ki jaka jong ki bad ban pyntip kloi ïa kino kino ki kam kiba suba.