NEW DELHI, Jylliew 06: Ka Diamond Harbor Football Club kaba dei ka lahduh jong ka Indian Football League (IFL), kan shah tohkit halor ki kam be-aiñ bad ki kam ba ïadei bad ka pisa tyngka, ong u Nisith Pramanik, Myntri ka tnad ïalehkai jong ka West Bengal ha ki nongthoh khubor ha ka sngi Thohdieng.
“La ïoh bun ki jingujor pyrshah ïa ka Diamond Harbor FC. Ki la mih ki jingkylli hato la seng ïa kane ka klob katkum ki kyndon ba la buh. Ki don ruh ki jingkynnoh ha kaba ïadei bad ka tyllong jong ka pisa jong ka klob bad ka rukom pyndonkam ïa ka pisa. Baroh kine ki bynta ki dang shah bishar bñiah”, la ong u Pramanik haba kren sha ki lad pathai khubor .
“Ki nongkyrshan ba bei tyngka jong ka klob ruh ki lah ban shah khot ban ïakren. Ngin sa bishar bñiah nangno ka wan ka pisa na ka bynta ka klob bad kumno la pynbiang ïa kita ki pisa.”
Ka DHFC, kaba la seng ha u snem 2022, ka dei ka klob ba long trai da u Abhishek Banerjee, uba dei u dkhot jong ka Parliament na ka Trinamool Congress uba dei ruh u National General Gecretary jong katei ka seng saiñ pyrthei.
Kane ka klob ka la mad ïa ka jingkiew kaba khraw ha kine ki saw snem ba la dep, da kaba kiew lyngba ka I-League 3, I-League 2 haduh ba mynta kan rah ïa ka IFL bad ïoh ban kiew kyrdan sha ka Indian Super League, kaba dei ka lympung phutbol ki shynrang ba ha khlieh duh jong ka ri.
U Pramanik u la batai ba ki la don ruh ki jingujor halor ka madan kilanmet jong ka klob.
“Yn sa shim khia shuh shuh halor ka jinglap jong ka jingtohkit, kaba yn sa pynbna paidbah shen,” u la ong.
“Ngi kwah ba man la ki klob kin leh bha bad kan kiew shaphrang. Hynrei lada lap ba kano kano ka klob ka leh ïa ki kam beaiñ, yn nym shah la ka long ha kano kano ka khep,” u la bynrap.
Ka jingtohkit ka pyndap ruh ïa ka jingartatien halor ka jingïashim bynta jong ka klob ha ka ISL. Haduh mynta, lai tylli ki klob – ka Punjab FC, ka Mohammedan Sporting bad ka Inter Kashi – ki la ïalehkai ha ka lympung phutbol ba ha khlieh duh hadien ba ki la kiew kyrdan na ka I-League, ïa kaba la pynkylla kyrteng thymmai mynta kum ka IFL.
