Naduh ba khang dewïong, da jingbym banse sha bar jylla hap leit wad bylla ki samla ka East Jaintia

Shillong, Jylliew 05 : U MLA ka Khliehriat ba dei ruh u Myntri barim ka sorkar jylla, Bah Kyrmen Shylla u la ong ba ki khun samla ka East Jaintia naduh ba khang tih dewiong ha u snem 2014 bun ki la mih shabar jong ka jylla ban leit wad bylla bad bunsien ki shah shim kabu haba ki don shajngai na ka iing.
Haba kren bad ki lad pathai khubor, u Bah Kyrmen Shylla u la ong ba shwa jong u snem 2014 ki samla na katei ka thain ki pahuh ka kam ka jam namar ba dang ïoh tih dewiong. “Hynrei bapli 12 snem mynta la shu ïai ap kumta kam dei shuh ka por bad bapli ha ka kutlad ki la mih ban leit wad bylla noh sha kiwei ki jaka,” u la ong.
Nangta u ong ruh ba da ka jingkyrmen ban ïoh bylla don napdeng jong ki, kiba shah shim kabu bad shah thok ha ki riew shimkabu ynda la poi sha kito ki jaka ba la kular ban ai kam ne ai bylla ïa ki. Une u nongmihkhmat u la ong ba kam dei satia ka jingkwah jongki ban leit bylla shabar jylla ne sha kiwei ki jaka hynrei bapli da ka jingbym banse.
Ha kajuh ka por pat u la ong ba ki samla ka thain ki dei pat ban long kiba peitngor bad husiar ba ynda ki la poi sha ki jaka trei khnang ba ki riew shimkabu kin ym ïoh ban pyn-ngop ïa ki.
Shuh shuh u ong ba ha kawei ka liang ki khun samla ki dei ban mih shabar ka jylla ban ïohi bad sakhi dalade ïa ka jinglong jingman khamtam ban wad ïa ki kam ki jam kiba ïadei bad ka kyrdan bad jingnang jingstad jong ki.
“Lada don ki kabu kiba biang ban leit trei shabar ruh ka biang eh naba ka sorkar jylla ruh ka pynshlur ïa ki wat ban leit trei shabar ri. Hynrei haba ki leit kan bha eh ba kin pyntip pat sha ki bor sorkar kum sha ki Deputy Commissioner ne SP jongngi ha kino kino ki distrik ba ki don ba ki don kum kita ki lad ïoh kam kiba khot bad phah wan trei ïaphi. Lada don kino kino kiba shu khot da ka jingïadei paralok ban wan trei khlem ka jingthoh ne ki jingpynshisha ba kidei ki jaka trei kiba shngain sngewbha ban husiar,” bynrap biang u Bah Kyrmen ba dei ruh u Myntri barim ka tnad Social Welfare.
Kumta, u ong ba lada ki kynduh kum kine ki khep kan bha shibun ban kiar khnang ban lait na kaba kynduh pat ïa ki jingjia ki bym sngewtynnad ha ka jingim jong ki.
U Bah Kyrmen u kyntu jur ïa ki samla ba lada don kino kino ki lad ïohkam shabar bunsien ki dei ban pyntikna shwa bad pyntip ruh sha ki bor sorkar khnang ba kin lait na ki jingshah thok bad shah shim kabu.