Buh u Symbud Myntri Rangbah ïa u mawnongrim jong ka surok na shnong Mawdet -Rynñiaw

Nongstoiñ, Jylliew 05: Ka shnong Rynñiaw kaba hap ha ka Rambrai Jyrngam C & RD Block kaba jngai kumba shiphew kilomitar na ka shnong Mawdet kaba don harud ka surok Rambrai – Mawrok ka dei ka shnong ka bym pat don surok satia ha kaba da ki bun bun phew snem ki paitbah jong katei ka shnong bad kiwei jong kiwei pat ki shnong kiba don ha katei ka thaiñ ki la angnud. Dei tad haduh une u snem 2026 ba ka jingangnud jong ki ïa ka surok ka la urlong namarba na ka liang ka sorkar ka la sngap ïa ka jingud jingnam jong ki.
Kumta ha ka sngi palei ka 4 tarik Jylliew u Bah Prestone Tynsong Symbud Myntri Rangbah ka jylla uba bad ruh ïa ka tnad PWD u la hiar dalade sha ka shnong Mawdet ban plie ïa u mawnongrim na ka bynta ban shna ïa katei ka surok.
Ha katei ka sngi ba u Symbud Myntri Rangbah ka jylla u la hiar sha katei ka shnong la synranlang da u R.G. Momin MLA ka Rambrai Jyrngam, u Bah Lurshai Kharbani MDC ki ophisar sorkar ba kynthup ïa u Bah S. Massar Superintendent Engineer PWD Road Western circle Bah Shimbor Puweiñ Asst Superintendent Engineer PWD Western circle bad kiwei kiwei ki ophisar.
Ha katei ka sngi hadien ba la plie ïa utei u maw nongrim la pynlong ïa ka jingïalang ba lynkot ha kaba la pynïaid da u Bah S. Puweiñ bad la ïoh ïa ka jingpynshai na u Bah S. Massar Superintendent Engineer ha kaba ïadei bad ka jingthmu ban pyntrei ïa katei ka surok.
U Bah Massar haba pynshai sha ki paidbah u la ong ba katei ka surok ka dei kaba pynïasoh bad ki shnong kiba hap ha ka Rimuliang C&RD Block bad ki don kumba khatsaw tylli ki shnong ki ban ïoh jingmyntoi ynda la dep ban shna ïa katei ka surok. Ha kajuh ka por u la ong ba katei ka jingjngai jong katei ka surok haduh ka shnong Nonglang ka long kumba 21 kilomitar hynrei ha kine ki bnai ban wan yn sdang ban pyntrei shuwa ïa ka phase I kaba 10 kilomitar katba ïa ka phase II pat ym pat lah ban pyntrei mynta namar ba ym pat dep ban sorbe hynrei ynda la dep lut ban sorbe ka PWD kan sa phah ïa ka Detail Project Report sha ka sorkar khnang ba kan mang pisa na ka bynta ban pyndep ïa katei ka surok.
Khatduh eh la ïoh ïa ka jingkren na u Bah Prestone Tynsong Symbud Myntri Rangbah ka jylla uba long u kongsan. U Bah Tynsong haba ai jingkren ha katei ka sngi u la ong ba na ka thong ba hakhmat eh jong ka sorkar ka long ban pynpoi surok ha man la ki shnong khnang ba kan pynsuk ïa ki paitbah ha ka leit ka wan ka kit ka bah bad kiwei kiwei. Ha kajuh ka por u la ong ba lada ka sorkar ka ai ïa kino kino ki jingïarap sha ki shnong ki thaw lada ka surok kam don kam don jingmut satia. Dei halor katei ka nongrim ba ka sorkar ka la ïaleh katba lah ban pynpoi surok ha man la ki shnong ki thaw.
U la kyntu ruh ïa ki paitbah ba kin ïatreilang bad ka sorkar ha baroh ki liang khnang ba ka jingangnud jong ki kan urlong.