1 lak hectre ka jaka hapoh ka prokram ïada mariang ong u Commissioner bad Secretary ka Tourism

Shillong, Jylliew 5 : Ka Sorkar Meghalaya ka la wanrah haduh 1 lak hectre ka jaka hapoh ka prokram ïada bad peit thuh ïa ka mariang lyngba ka prokram Afforestration and Payment for Ecosystem Sevices, ong u Commissioner & Secretary ka tnad Tourism, Vijay Kumar D,ha ka jingrakhe ïa ka World Environment Day 2026 ha ka sngi Thohdieng.
Haba kren ha Mawrah, East Khasi Hills, u Kumar ula kren halor ka jingkiew shakhmat ka Jylla ha ka kam ïada mariang bad ka roi ka par kaba neh, bad ong ba ka jingriewspah ka Meghalaya ha ka jingdon ïa ki khlaw ki btap bad ki jingthaw ba im ka la pynlong ïa ka kam ïada mariang kaba kongsan na ka bynta ka lawei jong ka.
U ïathuh ba ha kine ki san snem ba la leit, ki kam thungdieng ki la ïaid la jan kumba 25,000 hectare bad sa 14,000 la buh thong ban leh mynta u snem.
“Kane kan wanrah ïa kumba 40,000 hectare baroh lang hapoh ka prokram thungdieng ban ïada mariang” ong u Kumar.
Haba pynbna ïa u mawmer ba kongsan, ula bynrap “Lyngba ka jingwanrah lang ïa ka prokram Afforestration bad Payment for Ecosystem Services, ngi la lah ban wanrah hapoh 1 lak hectare ka jaka hapoh ka prokram ai jingïada bad jingpeit thuh”.
Ula ban jur ïa ka jingshim bynta lang jong ki Tnad bapher bapher halor ki jingsumar bad pynneh pynsah ïa ka mariang.
“Ki Tnad ha ki kam bapher bapher ki la synñiang lang ha ka liang ka jingpynneh pynsah ïa ka um, pynneh pynsah ïa ka khyndew, ka eco-tourism, ka jingïada ïa ki jingthaw ba im bad ka kamai jakpoh kaba neh” ula ong.
Ula kren ruh halor ka jingkiew sted ki kam jngohkai ha Meghalaya bad pynpaw ïa ka jingdonkam ban pynbiang ïa ka jingnang bun ka jingwan ki nongjngohkai bad ka jingpynneh ïa ka mariang.
Haba kdew sha ka Mawrah, u Kumar ula ong ba kane ka jaka ka long kum ka nuksa ba kumno ki jingkynshew kiba da thmu, ki lah ban pynkhlaiñ ïa ka jinglah kyrda ka mariang bad ka kamai jakpoh ki trai shnong.