Na ki ar kamra i ïing ba ngi sah ba ngi duk, ka ïalam shaduh ka kyrdan ba shalor, ong u Bah Sanbor
Shillong, Jylliew 05: U Myntri ka Tnat Arts and Culture ka Sorkar jylla u Bah Sanbor Shullai u la ong ba bun na ki longïing kiba duk bad kiba treishitom kiba poi barabor sha ka kyrdan kaba shalor ha ka jingim bad u la ai ruh ïa ka nuksa jong ki riewkhraw ka ri kiba la poi sha ka kyrdan President bad prime minister ka ri kiba dei ruh kiba wan na ki longïing kiba duk bad kyrduh bad ïathuh khana ruh shaphang ka jingim lajong ba na baban ka jingduk ula hap ban sah tang hapoh i ïing ba arkamra bad i kmie bad man ka janmiet pat ban ïarap die jhur ïa la i kmie ha Ïewdak Laban bad ym poi pyrkhat pat ba hadien un jop MDC, MLA bad mynta ban long Myntri sorkar.
Ïa kane u la ong kum u kongsan haba plie ia ka prokram Hand ONCARE 3D Printing in Prosthetic and Orthotic professional of NE India ka prokram ba la pynlong da ka ophis Commissioner for persons with Disabilities ka tnat Social Welfare, nangta ka State Council of Science Technology and Environment bad PT da ka jingïatreilang bad ka Instalimb India Private limited kaba la pynlong ha U Soso Tham Auditorium Shillong, na ka bynta ka 5 bad 6 tarik mynta u bnai.
Kane ka jingong jong u ka long ban ai mynsiem ïa ki briew kiba ïapher ha ka jinglong ki dkhot met khamtam eh kito kiba la duhnoh ia la ki kjat ha kaba mynta khlem duh jingkyrmen ki la ïoh ban pyndonkam da ki kjat ba la shna katkum kajuk mynta ne ki Artificial Limb ba la ai da ka Tnat Sorkar lyngba ka Instalimb India Private limited bad kiwei kiwei ki lad jingïarap.
Ha kane ka prokram ki la don 12 ngut ki nongïoh jingmyntoi kiba la ïohpdiang ïa ki artificial limb na ki district bapher bapher ka jylla ba la aiti da u Bah Sanbor Shullai bad kiwei kiwei.
Ha kane ka prokram la ïoh ruh ka jingkren na u Praveen Bakshi (IAS) Commissioner Secretary, nangta Dr. G Pandian Assistant Professor Head of Prosthetic and Orthotic, u Shoichiro Adachi MD and Chief Operating Officer Instalimb India Private limited, Kong Bridget Warshong Deputy Commissioner for persons with Disabilities, la ïoh ka jingkren pdiang sngewbha na u Bah Lyngkor Kynjing, MCS Commissioner for persons with Disabilities Meghalaya, nangta la don ka jingpyni ïa ki rukom shna ïa ki Artificial Limb bad ki jingmyntoi ba la pyndonkam ïa ki, nalor kiwei kiwei ki prokram.