Nongstoiñ, Jylliew 05: Ka seng HSPDP West Khasi Hills District Youth Wing, ha ka sngi thohdieng ka la leit ban aiti ïa ka jingthoh sha ka Hema Nayak Deputy Commissioner ka West Khasi Hills District, ban pan jaka na ka bynta ban ïoh ban pynïeng noh da u Motdur ba pura jong u bah (L) Maieit Hopingstone Lyngdoh MLA barim ka Nongstoiñ Constituency hapoh sor Nongstoiñ.
U Bah Wellesly Lyngkhoi President Youth Wing ka seng HSPDP u la ong, “Kane ka jingtyrwa ban shna bad pynïeng ïa u mot sahnam ba pura, ka dei kum ka jingburom ïa u (L) Hopingstone Lyngdoh, MLA barim ka Nongstoiñ Constituency bad u nongïalam ba don burom jong ka ‘Statehood Movement of Meghalaya’.
Ka seng ka la ong ba u bah Hopingstone Lyngdoh u ba la khlad noh, u la aiti ïa la ka jingim ha ka kam shakri paidbah, ka hok ha ka imlang sahlang, ka jingbha jingmïat jong ki paidbah ka jylla Meghalaya bad khamtam eh ha Nongstoiñ Constituency jong ka West Khasi Hills.
Une u rangbah u dei u nongïalam ka Hill State Movement Fighter jong ka jylla Meghalaya, u la shakri kum u CEM ka KHADC haduh 27 snem kum u MDC, kum u MLA u la shakri 43 snem bad kum u Deputy Chief Minister. U la bat ruh kum u dkhot ka Jylla (MP) jong ka Shillong seat Parliamentary Constituency. Ki jingnoh synñiang jong u kum u nongthaw aiñ, u nongsynshar Ri, kaba la long ka histori jong ka jylla.
U la don ka bynta kaba khraw ban kyntiew ïa ki jingangnud jong ka jaitbynriew Khasi, Jaiñtia, bad Garo bad u la neh kum u nongïalam u ba don burom ha ka jingim paidbah jong u baroh kawei. Kumta ka seng ka la tyrwa ba dei ban pynïeng ïa u Mot u ba biang ha ka jaka kaba paw bad kaba itynnad hapoh ka sor Nongstoiñ.
“Ki jingthmu jong ka jingtyrwa ka long ban burom bad pynneh pynsah ïa ka pateng jong u (L) Hopingstone Lyngdoh. Ban ai mynsiem ïa ki pateng ban wan lyngba ka jinglong nongïalam bad jingshakri jong u kaba long ka nuksa. Ban thaw ïa ka dak kaba don jingmut ha ka histori bad ka kolshor ha ka sor Nongstoiñ. Ban kyntiew ïa ka jingsarong (civic pride) bad ka jingsngewthuh ïa ka histori jong ka saiñ hima sima jong ka jylla Meghalaya”, ong u Bah Wellesly Lyngkhoi.
