Ryngkat ka jingpynkhuid ïa ka ïew Umjaraiñ bad thung dieng rakhe sngi pynneh mariang ka KSU

Mawkyrwat, Jylliew 05: Kum shibynta ban rakhe ïa ka Sngi Pynneh Mariang ne ka World Environment Day 2026, ka Khasi Students’ Union (KSU) Mawkyrwat Circle ka la pynlong ïa ka jingpynkhuid ïa ka Ïew Umjaraiñ kaba don hajan ka Hot Spring, da ka jingthmu ban pynkhuid ïa ka mariang bad ban pynsngewthuh ïa paidbah halor ka jingdonkam ban sumar ïa ka sawdong sawkun.
Ha kane ka sngi, la wan ban ïashimbynta shitrhem da ki nongïalam shnong, ki Seng Longkmie, ki Seng Samla Shnong, ki nongshong ïew, ki khynnah skul bad ki dkhot jong ki shnat treikam bapher bapher jong ka KSU na katei ka thaiñ. Ka jingïashimbynta paidbah ka la pynpaw ïa ka mynsiem jingïatreilang ban pynneh pynsah ïa ka mariang kaba khuid bad kaba koit ba khiah.
Ha kajuh ka por, ka KSU Mawkyrwat Circle ka la pynlong ruh ïa ka jingthung tynrai dieng ha ka St. Xavier’s College, Umoid, South West Khasi Hills District bad ha kane ka prokram la wan ban ïashimbynta lang da ki Phadar, ki samla pule jong ka kolej ryngkat bad ki dkhot jong ka Seng.
Ka Seng ka la ong ba kum kine ki prokram ki long shibynta na ka jingïakhun bad pynsngewthuh halor kumno ban pynneh pynsah ïa ka mariang bad ban pynshlur ïa ki paidbah, khamtam ki samla, ban shim ïa ka jingkitkhlieh ha kaba ïadei bad ka jingsumar bad jingïada ïa ka mei mariang na ka bynta ka lawei jong ki pateng ban wan.