Shillong, Jylliew 05: Ka Nongkseh SSCC ka la pynkut ïa ka samoi kaba nyngkong jong ka ha ka Meghalaya State League da ka namjop pyrshah ïa ka Langsning FC ha ka phainal ban rah syndon ïa ka nam lahduh jong ka MSL 5 hynne ka janmiet sngi Thohdieng ha SSA Stadium.
Ka Nongkseh ka la wanrah ïa ka jingïalehkai kaba kyrpang tam ha ka samoi ïalehkai baroh kawei ha kaba ka la wanphai na ka shi kol ban pynliem ïa ka Langsning da 2-1.
Kum ka lahduh ka Nongkseh ka la ïohpdiang ïa ka khusnam ryngkat ka cheque kaba T.8 lak na u Myntri Rangbah ka Jylla u Conrad K Sangma, ïa uba la synran lang da u Deputy CM Bah Prestone Tynsong, u Myntri ka tnad Sports bah Wailadmiki Shylla bad kiwei kiwei ki riew pawkhmat. Katba ka Langsning kaba wan ba-ar ka la khur ïa ka khusnam pisa kaba T.5 lak – kane ka dei ka pla khusnam kaba heh tam ha ka histori jong ka MSL.
Ha ka jingïalehkai, ka Nongkseh ka la shah lamkhmat ha ki minit pynjlan ba khatduh jong ka kylla step (45’+1) na ka kol ba la kum thep hi (own goal), hynrei ka la wanphai da kaba kham tyngeh ha ka kylla miet bad pynïakhaid lyngba u Hardy Cliff Nongbri (61′) shuwa ba u Shano Tariang (68′) un thep ïa ka namtam.
Haba kut ka jingïalehkai la sam ruh ïa ki khusnam shimet, ha kaba u Kitboklang Pale ka Nongkseh u la ïoh ïa ka nam Player of the Final, u Guidle Syiemlieh (Nongkseh) ïa ka khusnam Best Goalkeeper, u Nelson Rymbai jong ka Langsning ïa ka nam Top Scorer (23 kol) bad u Hardy Cliff Nongbri ka Nongkseh ïa ka khusnam Player of the Tournament.
Kane ka sienjam kaba 5 jong ka MSL ka kham heh haba nujor ïa ki snem ba ladep, ha kaba ki don haduh 33 tylli ki kynhun ba shim bynta kiba la pynïakhun ha ki 8 tylli ki jaka, bad ki jingïalehkai baroh ki long haduh 139 tylli.
