Ai khublei ka Medical Representative Blood Bank Jowai ïa ka CSR-Star Cement kaba ju noh syniang ïa ka snam

Khliehriat Jylliew 04: Ka tnat CSR jong ka company Star Cement Lumshnong East Jaiñtia Hills District, hynnin ka sngi ka la pynlong ïa ka prokram ai snam ei lane ka Blood Donation Camp, ïa kane ka camp la pynlong ha Star Club jong ka company Star Cement ha Lumshnong ha kaba ki nongtrei jong ka company lem bad ki heh jong ka Star Cement ki la wan shakhmat ban noh syniang ïa ka snam, ïa kane ka jingai snam la pyniaid da ka Chief Medical Representative na Blood Bank Jowai, ka Dr Ibansara Khyriem ha ka jingdon ryngkat lang u Medical Incharge jong ka Star Cement Hospital, u Dr Sunjiev Deka.
Ha shwa ban sdang ia ka jingshim snam ka la don ka jingialang ba lyngkot ha kaba la ioh ïa ka jingkren lyngkot na u Unit Head jong ka Star Cement, u Lokesh Kumar Bahety, la ioh ruh ïa ka jingkren pdiang burom na u Senior General Manager jong ka Adiministration Hr CSR, u ba dei u Air Vice Marshal uba la shongthait, u R.V Ram Kishore, la ioh jingkren ruh na ka Dr Ibansara Khyriem bad na u Management Representative jong ka company Star Cement Lumshnong, u Devender.K.Bansal.
Na ka liang ka Dr Ibansara Khyriem ka la ai ka jingkhublei sngew nguh bad sngew burom ïa ka company Star Cement Lumshnong, lyngba ka tnat CSR kaba la ju shim ïa kaba kum kane ka synjam ban noh syniang ïa ka sam sha ka Jowai Civil Hospital Blood Center lane ka Blood Bank Jowai, ka la bynrap ruh da kaba ong ” Kane ka prokram Blood Donation Camp ba ju pynlong da ka tnat CSR Star Cement Lumshnong ka long ka jingkyrshan ba radbah ïa ka Jowai Civil Hospital Blood Center nga ai khublei ïa u doctor jong ka Star cement bad ïa ki heh ka company kiba pynbit pynbiang ïa ki jingdonkam baroh ha kane ka prokram ai snam ei, nga ai khublei ruh ïa baroh kito kiba la kloi ban ai snam”
U heh jong ka Star Cement Lumshnong uba dei u Unit Head jong ka Star Cement, u Lokesh Kumar Bahety, u la ai khublei ïa ka kynhun jong ka Jowai Civil Hospital Blood Center kaba la kloi ban iatreilang bad ka company ha kaba pyniaid ïa kane ka jingnoh syniang ei da ka snam, u ai khublei ruh ïa kito baroh kiba dei ki nongtrei jong ka company kiba la mih shakhmat ban noh syniang ïa ka snam, u la ong shuh shuh ba ia kaba kum kane ka prokram Blood Donation Camp ka company kan sa pynlong biang sa h u bnai nailur (september).
Ha kane ka Blood Donation Camp, u Management Representative jong ka company Star Cement Lumshnong, u Devender.K.Bansal, kumjuh ruh u Head of Department CSR, u Kongshok Kamal Borah lem bad kiwei kiwei ki heh jong ka company ki la mih shakhmat ban noh syniang ïa ka sam sha ka Blood Bank Jowai.