Pyntreikam ki pulit ïa ka jingpynkylla ïaid kali, pyrkhing ban ïaid ha ki kynta ba wan u Amit Shah

Shillong, Jylliew 04: Ki bor pynïaid distrik ka East Khasi Hills bad ki bor pulit hadien ba ki la pyndep ban pynbna paidbah ba kan don ka jingpynkylla ïa ka jingïaid ki kali ha ki surok kiba dei hajan ka State Convention Centre namar ka jingdon jong ka jingïalang kaba heh ha katei ka jaka namar ki khlieh jong ki jylla bad ki khlieh jong ki sorkar jylla ka thaiñ shatei lam mihngi kila ïadonlang ha kane ka jingïalang kaba 73 jong ka NEC, kumta na ka liang jong ki, la ïoh ba ki la pyrkhing bha ha kane sngi Palei.
Ha kane ka sngi la ïohi ba naduh Mariot Hotel bad ki thaiñ Police Bazar la khang ha kane ka sngi ïa ki nongdie madan bad ha Police Bazar ym shym la shah ban ïeng kali ïa ki heh ki haiñ bad ha kajuh ka por ïa ki kali kamai kiba ju ïeng ha police Bazar ban ap ïa ki nongleit nongwan bad ha ki thaiñ Polo ka la don ka jingïapyni nia hapdeng ki paidbah bad ki pulit.
Lah ban ong ba ka jingïalang kaba 73 jong ka North Eastern Council ka la long ha ka sngi Palei ha State Convention Centre Shillong ha kaba u shongknor ka NEC u Myntri Kam Pohïing ka Ri India u Amit Shah u la wan ban ïa shim bynta ha kane ka jingïalang.
Ha kane ka jingïalang la donlang ruh u Myntri ba dei peit ïa ka Ministry Development of North Eastern Region (DoNER) u Jyotiraditya Scindia, u Lat ka jylla Meghalaya u C.H.Vijaya Shankar, u Myntri Rangbah ka jylla u Conrad K. Sangma, u Myntri Khynnah ka DoNER u Sukanto Mazumdar, u secretary ka tnad Kam Pohïing ka sorkar pdeng u Govind Mohan, u secretary ka DoNER u Sanjay Jaju bad ha kane ka jingïalang la ïa shim bynta da u Lat, u Myntri Rangbah ka jylla Arunachal Pradesh, Assam, Manipur, Tripura, Mizoram, Nagaland bad Sikkim bad ki heh sorkar.