Wan pyndem wait haduh 10,800 ngut ki kaikhlaw ha NE namar ba trei tyngeh ka sorkar u Modi : Amit Shah

Shillong, Jylliew 4 : U Myntri kam Pohïing ka Ri u Amit Shah ha ka sngi Palei ula ong ba ka Sorkar u Modi kala “pynlait ïa ka thaiñ Shatei Lam Mihngi na ka tyrsim ka jingjot namar ki kam kaikhlaw” haba kdew ïa ka jingwan pyndem wait jong ki palat 10,800 ngut ki samla kiba la wan phai pat sha ka imlang sahlang ha kine ki 12 snem bala leit.
Haba kren ha ka jingïalang ka North Eastern Council (NEC) kaba 73 ha Shillong, u Amit Shah ula ong ba ki jingpyrshang ba ïai bteng ban wanrah ïa ka jingsuk bad ka jingwan ka roi ka par ka la pynkylla ïa ka thaiñ.
“Ka Sorkar u Modi ka la pynlait ïa ka thaiñ Shatei Lam Mihngi na ka tyrsim ka jingjot namar ki kam kaikhlaw” ong u Amit Shah.
Ula ainam ïa kane ka jingkylla sha ki sienjam ban wanrah ïa ka jingsuk hapoh ka jingïalam u Myntri Rangbah Duh ka Ri u Narendra Modi. “Ha kine ki 12 snem ba la leit, palat 12 tylli ki soskular ïasuk la ïasoi ban pynkut ïa ki kam umsnam hapoh ka thaiñ Shatei Lam Mihngi bad palat 10,800 ngut ki samla la wanrah pat sha ka imlang sahlang hadien ba ki la pyndem wait”.
U Amit Shah ula pynïasnoh ïa ka jingwan phai ka jinglong ba jai jai sha ka jingkiew jong ka thaiñ, haba pynksan ba ka suk ka saiñ ka dei ka nongrim jong ka jingkiew shakhmat. “Ka nongrim jong ka roi ka par lah ban buh ha ki paia jong ka suk ka saiñ kaba biang bad ka jingïalong kawei ha ka imlang sahlang” ula ong.
U Myntri kam Pohïing ula ong ba kine ki 12 snem ki la ïohi ïa ka jingpyrshang ba la pynleit jingmut bha jong ka Sorkar Pdeng ban pyntyllun sted ïa ka roi ka par jong ka thaiñ Shatei Lam Mihngi.
“Nalor u Narendra Modi, lehse ym pat ju don ki Myntri Rangbah Duh kiba la trei da kane ka jingpynleit jingmut ba ïai bteng bad ka jingaiti sha ka roi ka par jong ka thaiñ Shatei Lam Mihngi” ula ong.