SHILLONG, Jylliew 04: Ka kynhun ki nongïalehkai Kickboxing jong ka jylla hapoh ka lama jong ka Meghalaya State Kickboxing Association (MSKA) ka la lah ban wanphai sha la ïing ryngkat bad 9 tylli ki takma, da kaba khur 3 tylli ki takma ksiar, 3 tylli ki takma rupa bad 3 tylli ki takma rnong ha ka Junior Boy’s & Girl’s National Kickboxing Championship.
Kane ka Championship ka la long ha Khurda, Odisha naduh ka 30 tarik Jymmang haduh ka 03 tarik jylliew 2026, bad ïa ka kynhun jong ka jylla la synran lang da ka Daniella I W Mylliemngap kum ka Coach.
U Derick Dashankur Nongrum, ba shim bynta ha ka K1 Rules below 54 kgs u la bteng ban bat ïa ka nam kum u lahduh jong ka ri (National Champion) ha ki lai snem lynter ha kane ka kynti da kaba pynliem ïa u nongïakhun pyrshah jong u na Goa ha ka jingïakhun ba khatduh ban ïoh ïa ka takma ksiar.
Katba u Aedriel Gordon Ranee, u la hap ban hun ïa ka takma rnong ha ka K1 Rules below 48 kgs hadien ba shah rem ha ka Semi final pyrshah ïa u nong Manipur.
Ha ka liang ki kynthei, ka Nathania Mylliem Umlong, kaba shim bynta ha ka Low Kick below 48 kgs, ka la ïoh ban khur ïa ka takma rupa kaba nyngkong eh jong ka ha kane ka lympung.
U Aldrin Osmond Pariat, uba ïakhun ha ka K1 Rules below 60 kgs, ryngkat bad u Darren Ervin Blah uba ïakhun ha ka Full Contact below 51 kgs, ki la lah ban jop takma ksiar da kaba pynliem ïa ki liang pyrshah na Himachal Pradesh bad Odisha ha ka jingïakhun phainal.
Kiwei pat kiba la khur takma rupa ki long u Misariio Nongdhar, ha ka Full Contact below 45 kgs, ryngkat bad ka Sumarlang Kharumnuid ha ka K1 Rules below 57 kgs hadien ba ki la shah rem noh ha ka phainal ha ki nongïakhun pyrshah kiba na Kerela bad Tamil Nadu.
U Merapkerlang Lyngwa (Full Contact below 63 kgs) bad u Hamebuhnam Pathaw (Full Contact below 45 kgs) ki la pyrshang katba lah ban poi sha ka phainal hynrei ki la shah rem noh ha ki nongïakhun pyrshah kiba na Maharashtra bad Jharkhand, kaba pynlong ïa ki ban hap hun ïa ka takma rnong.
Kaba sngewtynnad ka long ba da kane ka jingjop ha Khurda Odisha, ka jingkheiñ khur takma jong ka Meghalaya State Kickboxing Association naduh u Nailar 2017 ka la kynjoh 321 tylli ki takma kaba kynthup ïa ki 104 tylli ki takma ksiar, 102 tylli ki takma rupa bad 115 tylli ki takma rnong.
ïa kane ka Championship la pynlong katkum ki kyndon jong ka WAKO (IF) Italy Hq bad ka WAKO India Kickboxing Federation (Standard Operating Procedures).
Kane ka long katkum ka kyrwoh na u Hony. Working President jong ka Meghalaya State Kickboxing Association, bah Lorenzo P Warjri.
