Nalor ba duna hap iehnoh ki Doktor ïa ki nongpang ban leit bud ïa ki heh ki haiñ

Nongpoh, Jylliew 03: Ka Ri-Bhoi People’s Council (RBPC) hapoh ka jingïalam u President Bah Jayson Lennox Nongrum bad u General Secretary Bah Vincent Sohkhwai, mynta ka sngi ka la leit ban jurip ïa ka Nongpoh Civil Hospital bad jingïakynduh ïa ka Dr AR Marak, District Medical and Health Officer (DMHO), Ri-Bhoi, halor ka jingduna doctor bad khamtam ka jingbym don doctor ba pura ha Special Newborn Care Unit (SNCU) bad Nutrition Rehabilitation Centre (NRC).
Kane ka jingleit jurip jong ka seng ka long hadien ba la mih bun ki jingud bad jingujor na ki paidbah kiba leit sumar ha Nongpoh Civil Hospital namar ka jingbym biang ki jingshakri paidbah ha ka liang ka koit ka khiah. Ka seng ka la pynpaw ruh ïa ka jingsngewkhia halor kiba bun ki post kiba dang thylli ha ka tnad ka koit ka khiah ha Ri-Bhoi, kynthup ïa ka Additional DMHO, District Malaria Officer bad ki doctor ha ki PHC bapher bapher kum ha Mawlasnai PHC.
Haba kren sha ki lad pathai khubor, u Bah Jayson Lennox Nongrum u la ong ba watla ka Ri-Bhoi ka dei ka Aspirational District kaba ka sorkar ka phai khmat kyrpang ha ki kam pynroi, hynrei ka tnad ka koit ka khiah ka dang mad ïa ka jingduna briew kaba jur. U la ong ba katkum ka jingïoh jingtip jong ka seng, tang lai ngut ki doctor paediatrician kiba don mynta ha Nongpoh Civil Hospital, kiba hap ban peit lang ïa bun bynta jong ka hospital kynthup ïa ka SNCU, NRC, kamra kha khyllung bad OPD, kaba buh jingeh ïa ki nongpang kiba wan wad jingsumar.
Na ka liang ka DMHO ka la pyntip sha ka seng ba ka ophis ka la dep ban pynbna ïa ki post Medical and Health Officer na ka bynta ka SNCU, NRC, Barapani State Dispensary UHWC bad Umran Dairy UHWC, hynrei haduh mynta tang uwei uba la wan thep ïa kitei ki post ba lait.
Ka RBPC ka la kyrpad ïa ka sorkar jylla ba kan shimkhia mardor ban pyndap ïa kine ki post kiba dang thylli bad ban wad ruh ïa ki daw kiba pynlong ïa ki samla pule doctor kiba la pyndep ïa ka jingpule ban ym kwah ban rung sha ka kam sorkar. Ka seng ka la ong ruh ba lada donkam kan sa leit ban ïakynduh ïa u Myntri ba peit ïa ka tnad ka koit ka khiah jong ka sorkar jylla halor kane ka bynta.
Shuh shuh, ka RBPC ka la pynpaw ïa ka jingsngewkhia ba wat hapdeng ka jingduna doctor, bun na ki doctor ki dang hap ban mih na ki jaka trei ban leit synran ïa ki heh ki haiñ kiba wan sha Meghalaya lyngba ka Ri-Bhoi District. Ka seng ka la ong ba kane ka long ka bym lah ban pdiang namar ka pynthut ïa ka jingshakri paidbah bad buh jingeh ïa ki nongpang kiba ap ban ioh jingsumar.
Namarkata, ka seng ka la kyrpad ïa ka sorkar jylla ba kan pynthikna ba ki doctor kin lah ban trei pura ha ki kam ba ïadei bad ka jingsumar bad ym ban shah pyndonkam ha kiwei pat ki kam kiba ktah ïa ka jingshakri ha ki hospital.