Plie u Bah K.P.Pangñiang ïa u mot sah jingkynmaw ïa ka jingkhlad noh jong u (L) bah Hindro

Nongstoiñ, Jylliew 03 : Ha kane ka sngi balang ka 03 tarik Jylliew u bah K.P.Pangñiang MLA ba rim ka Rambrai Jyrngam u la hiar sha ka shnong Langpih ban ïadon ryngkat ha ka jingleh burom jong ka Kur Samakha bad ki paitbah jong ka Raidmynsaw ïa ka lyngkhuh snem ba nyngkong jong ka jingkhlad noh jong u (L) bah Hindro Samakha.
Kum ka dak jong ka jingkynmaw burom ïa utei nongïalam ka Raidmynsaw ka Kur Samakha rynkat ki nongïalam jong ka Raidmynsaw ki la tei ïa u mot sah jingkynmaw ha khmat ka madan jong ka Raidmynsaw Upper & Secondary School. Ha katei ka sngi shuwa ban sdang ïa ka jingïalang kynmaw burom ïa utei u rangbah ba la khlad noh u bah Pangñiang la plie ïa tei u mot da u bah K.P.Pangñiang ha ryngkat ka jingïadon lang jong ki rangbah kur, ki khun ki kti jong u bah Samakha, ki nongïalam ka Raidmynsaw, ki nonghikai jong ka raidmynsaw Upper & Secondary school ki khynnah skul, ki nongshong shnong bad ki paitbah jon ka thaiñ Langpih.
Hadien ba la plie ïa utei u mot la pynlong ka jingïalang ba lynkot ha phyllaw jong ka skul ha kaba la pynïaid da u bah S.P.Nongphud Chairman ba mynta jong ka Raidmynsaw sidarship . Ha katei ka jingïalang la ïoh ïa ka jingkren na u bah Lestar Samakha uba dei u para trai jong u (L) bah Hindro Samakha na u khun nynglkong jong u bah Hindro Samkha .
U bah Lestar haba ai jingkren ha katei ka sngi u la ñiew tang halor ka jingduh noh ïa u hynmen rangbah jong u uba long ruh u nongïalam uba la aiti lut met bad mynsiem ban shakri ïa ki paitbah.Nalor kata u la pynkynmaw ruh ba naduh ba u dang long u Myntri ha ka por ba ka Raidmynsaw ka dang hap hapoh ka jingpeit jingkhmih jong ka hima Rambrai bad ma u pat u dang bat kum u secretary jong ka shnong Langpih. U la pynkynmaw ba ka jingthombor jong ki pulit Assam ha kita ki snem ka dang jur bha hynrei da ka jingshlur bad ka jingshynrang mynsiem jong u hynmen jong u ban ïalam ïa ki paitbah ban ïaleh pyrshah ki pulit Assam ki hap ban kynran dien bad pyndem .
Ha katei ka sngi la ïohruh ïa ka jingkren na ki nongseng ïa ka Raidmynsaw Uper primary skul kata na u babu Jospar Wanñiang bad na ka liang ki nonghikai pat la ïoh ïa ka jingkren na ka kong Erildsa Thongni ka Nonghkai kaba la aiti met bad mynsiem bad shakri ïa katei ka skul na ka bynta ban ai jingnang jingstad ïa ki khynnah kiba wan pule ha katei ka skul.
Na ka liang ka ki nongïalam ka Raidmynsaw pat la ïoh ban ai jingkren da u bah Trasdingland Nonglang. Ha kajuh ka por la ïoh ïa ka jingkren na u bah Swingly Samakha sordar shnong barim jong ka Langpih uba bat mynta kum u Chairman jong ka Komiti ïew Langpih. Khatduh eh la ïoh ïa kajingkren na u bah .K.P.Pangñiang uba long u nongaibuit jong ka Raidmynsaw haduh mynta.
U bah Pangñiang haba ai jingkren ha katei ka sngi u la pynkynmaw ïa kajing aiti lut bad ka jinlen lade jong u bah Hindro Samakha na ka bynta ban kyntiew ïa ka thaiñ ym tang ha ka roi ka par hynrei ban kyntiew ïa ka pule puthi lyngba ki skul. Ha kajuh ka por u la pynkynmaw ba ka jinglah ban kyntiew kyrdan ïa ka Raidmysaw Upper Primary sha ka Secondary school ka dei lyngba ka jingbtin lynti jong u bah Hindro Samakha uba la aiti lut met bad mynsiem bad u bym ju shong thait ban leit tur sha ki bor ba halor ban kyrpad ba kin shimkhia ban pynïoh ïa ki jaka pule kiba biang na ka bynta ki paitbah nongshong shnong ka Raidmynsaw.