Balei u Syiem Khynnah ka Hima Mylliem um lah ban shimti kum u Acting Syiem buh jingkylli ka ïingbishar HC ïa ka KHADC

Shillong, Jylliew 2 : Ka Iing Bishar High Court jongka jylla ka la shim khia bha ïa ka hukum ba pynmih da ka Khasi Hills Autonomous District Council (KHADC) ba ong ba u Syiem Khynnah (Deputy Syiem) ka Hima Mylliem u Mansan Manik Syiem, “um long uba bit” ban shimti ïa ka kam Acting Syiem ka Hima Mylliem namar ba u dei u para jong u Syiem ba shah sospon.
Haba shong bishar ia ka mukotduma ha ka 1 tarik Jylliew, u Justice HS Thangkhiew ula pynsngew ba u nongmudui ula pynpaw ïa ka kam kaba sngew ïahap bha ban tuklar da kane ka ïing Bishar mynta hi” bad buh ïa kane ka kam ban nang Shong Bishar shuh shuh ha ka 3 tarik Jylliew, 2026.
Ka jingmudui ka tynjuh pyrshah ïa ka hukum jong ka Khasi Hills Autonomous District Council (KHADC) ba pynmih ha ka 22 tarik Jymmang, 2026.
U nongïasaid u nongmdui u Philemon Nongbri, ula ïasaid ba ka hukum ka dei kaba la “soi tang da u Executive Member marwei, kaba long pyrshah ïa ka Kyndon Aiñ ba 25 jong ka Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong of Mylliem Syiemship) Act, 2007.”
Ula kdew ruh ba ka kyndon 9 jong ka Aiñ, kaba ong ba “ka dei ka kamram jong u Syiem kat kum ka riti ka dustur ban jied napdeng ki para ba la rangbah lane ki pyrsa jong u Syiem ban long u Syiem Khynnah ne Deputy Syiem”.
Ka bynta kaba lai ka long halor ka kyndon 8, kaba ong ba haba lai tylli ka shuki u Syiem namar ka jingshah sospon, “Ka Executive Committee ka lah da kaba pynmih ïa ka hukum da ka jingthoh ba kan thung ïa u Syiem Khynnah kum u Acting Syiem” ryngkat ka kyndon ba shah ban thung ïa kino kino ki rangbah khasi na ka Kur Syiem Mylliem, “ha ka jingïasyllok lang bad ka Executive Durbar” lada ka dawa ka kam.
U Bah Philemon ula pynpaw ba ki nongshah mudui ki la “ïaid palat ïa kaei kaba don ha ka aiñ” bad ka hukum ba la tynjuh “naba ka dei kaba pynkheiñ ïa ka Aiñ, kane ka juh ka long kaba sniew hakhmat ka aiñ bad ka dei kaba hap ban kdat noh sharud”.
Haba mihkhmat ia ka KHADC, u Senior Advocate HL Shangreiso ba la iarap da u T Dkhar, ula pynpaw ba “Kam long kaba shisha ba ka hukum ka dei kaba la mynjur da u Executive Member marwei, haba kdew ïa ki mat jingïakren jong ka Executive Committee ba long ha ka 21 tarik Jymmang 2026.
U ong ba ka KHADC ka la pyrkhat ïa ka jingïadon jingïadei u nongmudui bad u Syiem ba shah sospon bad kane ka la lam sha ka jingpynmih ïa ka hukum. “Halor ka proviso jong ka kyndon 8(1), ula ïasaid ba kam “long kaba hap ban leh hynrei kaba lah ban jied”.
U Justice Thangkhiew hadien ba shong bishar ïa ki kot ki sla ula pynpaw “Haba pule ïa ka hukum ba la tynjuh kan pyni ba ka daw ba la kdew ha ka ban kyntait ïa u nongmudui Syiem Khynnah ba u long uba biang ban thung kum u Acting Syiem ka dei namar ka jingshisha ba u dei u para trai jong u Syiem ba shah sospon”.
Ka ïing Bishar ka bynrap “Shuh shuh ka la pynpaw ba watla kane ka hukum ka mih na ki mat ïakren jong ka jingïalang ba 21 tarik Jymmang, ïa kane ka juh (hukum) la soi tang da u Executive Member marwei ha ka 22.05.2026”.
“Kaei kaba pynshon bha ïa ka ïing Bishar ha kane ka kam ka dei ka kyndon 9 jong ka Aiñ, kaba buh da u pud ban pyrkhat na ka bynta ban thung ïa u Syiem Khynnah napdeng ki para ba la rangbah lane pyrsa jong u Acting Syiem” ong ka hukum.
“Kane ka kyndon namar kata ba ka don da u pud ban pyrkhat ïa ki para ba la rangbah lane pyrsa ba ki lah ban shah thung kum u Acting Syiem, ka daw ba la pynpaw ha ka hukum ba la pynmih ka dei kaba hap ban shong bishar”.
Haba ailad ïa ki nongshha mudui ban ai jingpynshai bad baroh ki kot ki sla ba kin aiti lang, ka ïing Bishar ka ong “yn pyrshang ban pynbeit noh ïa kane ka kam ha ka sien shong bishar ban wan”.