Shillong, Jylliew 2: Ka Khasi Jaiñtia Government Contractors & Supplier Association (KJGCSA) ka la aiti ïa ka dorkhas sha u Myntri Rangbah ka Jylla u Conrad K Sangma, da kaba pan jingïarap mardor halor ki jingeh ba ki government contractors and suppliers ki ïakynduh ha ka Jylla.
Ha katei ka dorkhas, ka Association ka la ong ba ki kontraktor trai ri ha Khasi Jaintia ki shah pynduh lad ban ïa shim bynta bad ban ioh jingmyntoi na ki projek sorkar hapoh ka District.”
Ki la bynrap ba “ki jingeh ha kaba ïadei bad ka jingsiew bill ka bym long ryntih” ka ktah ïa ki dkhot bad ka kamai kajih bad ka jinglah ban trei jong ki ïa ka kam.
Ka Association ka la buh saw tylli ki jingdawa ba kongsan.Halor ka Jal Jeevan Mission, ka la kyntu ïa ka sorkar ba kan peit lem ïa ki jingsiew ba dang sahteng, da kaba ong, “Namar ba ki Bill sha ka JJM ki dang hap ban pyndep, bun ki kontraktor ki ïakynduh jingeh ha ka liang ka pisa tyngka.”
Ka dorkhas ka la kyrpad ban tuklar lem ban bthah ia ka tnad PHE ban pynkhuid kumba 50 percent ïa ka pisa na kiwei pat ki source. Ka la kyrpad ruh ban “pyllait kloi ïa ki bill kiba dang sahteng na ka bynta ki skhim ka sorkar pdeng hapoh ka Water Resources na ka bynta u snem 2024-2025.”
Halor ka tnad PWD, ka Association ka la ong ba ka rukom khot tender ha ki package baheh khlem da phiah ïa ka kam ka ai jingmyntoi tang ïa ki katto katne ki kontraktor kiba heh, kaba pynduh kam ïa ki kontraktor trai ri.
Ka la kyntu ïa ka sorkar ban “phiah ïa ki tender ban ailad ïa ki kontraktor trai ri ban ïa shim bynta bad ban kyntiew ïa ka roi ka par bad ka jingbha jong ka kam.”
“Ka tnad ka dei ban pynthikna ïa ka jinglong khuid ha ka kam jong ki lyngba ka rukom tender.Kane kan kyntiew ïa ka jingiakhun kaba hok, ka jingtrei kaba bha,” la ong ka dorkhas.
Ka Association kala kyrpad ruh “ban pynsangeh noh ïa ki tender ba jan bad ki jingtrei lypa ïa kam ha ka tnad PWD khlem ka sanction order” bad ka la bthah ban pynsangeh noh ïa ki kam ha ka tnad Soil & Water Conservation, Wildlife, bad Forest departments.
“Ha ka jaka kata, khot tender na ka bynta ki kam khnang ba ki kontraktor trai ri kin lah ban ïashim bynta,” ka la ong.Haba pynpaw ïa ka jingsngewnguh ïa ki jingpyrshang jong ka sorkar ïa ki kam pynroi, ka Seng ka la ong, “Ngi kyrpad ïa ka jingtuklar jong phi ban pynthikna ba ki kontraktor trai ri kin ym shah pynduh ïa ka kamai kajih bad ka bhah kaba dei hok ha ka jingpynroi.”
