Nang bteng ka jingshah thngan u nongïalam ka JMCSWA bad ki dkhot ha Ladrymbai ba dawa plie dewïong

Khliehriat Jylliew 02: Ka jingïakhih kaba la pynlong da kaba shong shah thngan ba la lamkhmat da u President jong ka Jaiñtia Coal Owner, Miners Supplier and Workers Association (JCMSWA), u Bah Marshal.S.B.Biam bad ki dkhot, ka dang ïai bteng, ïa kane ka jingshah thngan ki la sdang naduh ka sngi Nyngkong ha ka por 10 baje mynstep bad ka seng ka la shim ïa kane ka sienjam ban pynpaw bad pynsngew sha ka sorkar ïa ki jingeh ba ki paidbah ki mad na ka daw ka jingshah khanglad ban tih bad shalan dewïong.
Naduh hynnin mynmiet ki la don bun ki longkmie kiba na East Jaiñtia Hills District kiba la wan bad ai ka jingkyrshan ïa ka seng Jaiñtia Coal Owner, Miners Supplier and Workers Association (JCMSWA) bad mynta ka sngi ruh kiba bun ki kynhun sengbhalang, ki longkmie, longkpa kiba la wan ban ai mynsiem bad ai jingkyrshan ïa u President bad ki dkhot ka JCMSWA, kiba la wan ai jingkyrshan bad ai mynsiem ki kynthup ka Hima Sutnga Youth Federation ba la lamkhmat da u President, u samla Nangbah Nongtdu, u President jong ka Voice of People East Jaiñtia Hills District, u Bah Damewanhi Rymbai, ka seng Hynñiewtrep Youth Development Council (HYDC) ba la lamkhmat da u President East Jaiñtia Hills District, u Bah Mihsalan Tho, ka Jaiñtia National Council ba la lamkhmat da u Environment Secretary, u Bah Nini Sungoh, ka Seng Dedicate for Public Transformation Jaiñtia Hills Society ba la lamkhmat da ka Kong Jhanika Siangshai, la wan ai mynsiem ruh da u MDC barim jong ka Sutnga-Narwan Constituency, u Bah Hoping Bareh, kumjuh ruh ki longkmie kiba na ka shnong Wapungskur, Wapungshnong, na Lumshyrmit, na Moolang bad na kiwei kiwei ki shnong.
Ka kong Jhanika Siangshai, ka la ong, “Kumba long mynta kiba bun ki khun samla na East Jaiñtia Hills District, ki la hap ban mih shabar ka jylla ban leit wad kam, wad jam namar na ka daw ba khang dewïong bun ki la shu shong khlem kam, ngi ïohi ha ki por kiba mynshwa dei kiba na bar jylla kiba wad kam sha ka thaiñ Jaiñtia, nga kyrpad jur ïa ka sorkar khamtam ïa u Mynri Rangbah ka jylla u Conrad Sangma ban pyrkhat kloi halor kane ka kam dewïong.”
Shuh shuh ka Kong Siangshai ka phah ruh ïa u kyrwoh khubor sha u Conrad Sangma da ka ong ba un wad ki lad ki lynti ha kaba ïadei bad ka kam dewïong, ki paidbah ki la mad jingeh bha, bun ki khynnah ki la pep skul noh shiteng por, ka la kyntu ruh ba un sngewbha ban wan markhmat ban ïakynduh ïa ki paidbah ban kren bad sngap ïa ki jingeh ki paidbah kiba im ja da kaba tih dewïong.
Kumjuh ruh na ka liang ki longkmie, ki la pynpaw ka jingsngewnguh na ka bynta u Bah Marshal Biam uba la mih shakhmat bad ïeng rangbah na ka bynta ki paidbah ba duk ba rangli kiba ju im ja kpoh na u dewïong, ki la ai ruh ka jingkitbok kitrwiang ïa u Bah Marshal Biam ba un nanglah ban ïaid shaphrang ha kane ka kam ba ïadei bad ka kam dewïong khnang ba ki paidbah baroh kin ïoh biang ban trei dewïong.