Plie paidbah u Myntri Sorkar Pdeng ïa ka Integrated Multipurpose Indoor Sports Complex ha Shillong

Shillong, Jymmang 30 : U Myntri Sorkar Pdeng ba dei peit ïa ka Tnad Youth Affairs and Sports, u Dr. Mansukh Mandaviya, mynta ka sngi u la plie paidbah ïa ka Integrated Multipurpose Indoor Sports Complex ha Shillong bad u la sakhi ruh ïa ka jingïasoi ïa ka Host State Contract na ka bynta ka 39th National Games 2027 hapdeng ka Sorkar Meghalaya bad ka Indian Olympic Association (IOA).
Ha kane ka prokram la ïa donlang u Myntri Rangbah ka Jylla Meghalaya u Conrad K. Sangma, ka Myntri Khynnah jong ka sorkar pdeng ba dei peit ïa ka Tnad Youth Affairs and Sports ka Raksha Khadse, u Myntri ka Tnad kam ïalehkai jong ka jylla Meghalaya u Bah Wailadmiki Shylla, President jong ka Indian Olympic Association ka PT Usha, u Chief Secretary ka jylla Meghalaya u Dr. Shakeel P. Ahammed, ki heh ophisar, ki nongïalehkai bad ki nongmihkhmat jong ki seng ïalehkai bapher bapher.
La tei ha ka jinglut kaba T.132.9 klur, ka Integrated Multipurpose Indoor Sports Complex kadei ka jaka ban pynlong ïa ki jingïalehkai bapher bapher kaba la biang katkum ka juk mynta kaba lah ban pynlong ïa ki jingïalehkai basketball, badminton, volleyball bad kiwei kiwei ki jingïalehkai hapoh ïing. Ïa kane ka jaka la thmu kum ka jaka ba kongsan na ka bynta ka lympung ïalehkai National Games kaba 39 bad ka kynthup ïa ki hall ba lah ban pyndonkam ha ki rukom bapher bapher, ka auditorium bad kiwei kiwei ki jaka ba la pynïasoh lang.
Haba ai jingkren ha kane ka jingialang, u Dr. Mandaviya u la ong ba ka jingplie ïa kane ka complex ka long kum ka jingplie ïa ka khyrdop sha ka lawei jong ka jylla Meghalaya lyngba ka kam ïalehkai. Haba kren shaphang ka jingplie ïa kane ka jaka lyngba ki jingkhang jong ka ha ka jaka jong ka jingïalang khap ribon, u la ong ba ka pyni ïa ka jingplie ïa ki lad ki lynti kiba thymmai na ka bynta ki samla jong ka jylla Meghalaya bad ka thaiñ shatei lammihngi.
Haba batai ia ka kam ïalehkai kum ka hok ba kongsan bad ka atiar kaba khlain jong ka roi ka par, u Myntri Sorkar Pdeng u la ong ba ki jingbei tyngka ha ki jingdon jingem ba ïadei bad ka kam ïalehkai kidei ki jingbei tyngka ïa ka lawei jong ka imlang sahlang. U la ong ba kane ka complex kaba dang plie thymmai kan kyntiew ïa ki nongïalehkai ki ban wanrah nam bad burom ïa ka jylla Meghalaya bad ka India ha ki rynsan ïalehkai ha ka ri bad shabar ri.
Haba ban jur ïa ka jingkut jingmut jong ka Sorkar India ban kyntiew ïa ki nongïalehkai, u Dr. Mandaviya u la ong ba ki rukom treikam kiba pynshong nongrim ha ka science ha ki kam ïalehkai ki nang kham bun ban ithuh bad kyntiew ïa ki sap. U la ong ruh ba katba ka thaiñ shatei lammihngi ka don tang kumba saw percent na ka jingbun briew jong ka ri India, hynrei ka pdiang ïa jan 25 percent na ki Khelo India Centre jong ka ri, kaba pyni ïa ka jingdonkam jong kane ka thaiñ ha ka jinglong jingman ka kam ïalehkai jong ka ri India.
Haba kren shaphang ka National Games kaban sa long shen, u Dr. Mandaviya u la ong ba ka Meghalaya ka la shim ïa ka jingkitkhlieh kaba khraw da kaba mynjur ban pdiang ïa kawei na ki lympung ïalehkai kaba heh tam ha ka ri India kaba ïashim bynta palat 8,000 ngut ki nongïalehkai. U la pynpaw ka jingshaniah ba ka National Games kaba 39 kan buh ïa ki nuksa kiba thymmai ha ka jingtbit ha ka jingïalehkai bad ka jingpynïaid ïa ki kam.
U Myntri Sorkar Pdeng u la ban jur ruh ïa ka lad kaba khraw ba ka jylla Meghalaya ka don ha kaba ïadei bad ka kam jngohkai pyrthei, ka kam pdiang briew, ka roi ka par kaba ïaineh bad ka rep ka riang kaba khlem ber dawai. Haba kren shaphang ka jingthmu ban shna ïa ka High Altitude Training Centre ha Meghalaya, u la ong ba kane ka jaka kan plie ki lad ki lynti ban ai jinghikai katkum ka juk mynta ïa ki nongïalehkai na kylleng ka ri bad kan nang pynkhlaiñ shuh shuh ïa ka jinglong jingman ka kam ïalehkai jong ka India. U la pynpaw biang ïa ka jingkloi jong ka Sorkar India ban kyrshan ïa kane ka projek.
U Dr. Mandaviya u la ïaroh ïa ki sienjam ba heh jong ka Meghalaya ha kaba ïadei bad ki jingdon jingem na ka bynta ka kam ïalehkai, kynthup ïa ka jingtei ïa kaei kaba la khmih lynti ba kan long ka madan ïalehkai phutbol kaba heh tam ha India bad Asia ha ka jinglut kaba la antad haduh T.700 klur. Haba kren shaphang ka jingthmu “Play in India” jong u Myntri Rangbahduh ka ri u Narendra Modi, u la ong ba kum kine ki jaka ki lah ban khring ïa ki lympung ïalehkai nabar ri bad kan plie ki lad kamai na ka bynta kane ka thain.
U Myntri Sorkar Pdeng u la kren ruh shaphang ka jingtyrwa ban seng ïa ka High Altitude Training Centre ha NEHU, ïa kaba ka sorkar India ka kloi ban bei tyngka kumba T.150 klur. U la ong ba kane ka jaka kan plie ki lad ki lynti ban ai jinghikai katkum ka juk mynta ïa ki nongïalehkai na ka jylla Meghalaya, ka thain shatei lammihngi bad na kylleng ka ri.
Haba kren shaphang ka lad ba ka Meghalaya ka don ha kaba ïadei bad ka rep ka riang, u la ong ba ka jylla ka pynmih ïa ki jait soh bad ki jhur organic kiba bun jait bad ka don ha ka kyrdan kaba biang ban long ka nongshalan ba kongsan ïa ki mar rep organic kiba bha tam. U la ai jingmut ba ki jingïatreilang kiba kham khlaiñ ki lah ban ïarap ban pynïasoh ïa ki mar jong ka Meghalaya bad ki iew jong ka ri bad ban wanrah ïa ki lad ki lynti kiba kham bha na ka bynta ki nongrep.
U Dr. Mandaviya u la ban jur ruh ïa ka jingthmu jong u Myntri Rangbahduh ban pynkhlaiñ ïa ka jinglong jingman ka kam ïalehkai jong ka India lyngba ka Khelo Bharat Mission, ha kaba ki nongïalehkai ba pawkhmat kin seng ïa ki club bad ki academy ryngkat ka jingkyrshan jong ka sorkar. Haba pynkynmaw biang ïa ka jingangnud jong ka India ban pynlong ïa ka Olympic Games ha u snem 2036, u la ong ba ka ri ka thmu ban don napdeng ki shiphew tylli ki ri kiba hakhmat duh ha ka jingïoh takma Olympic ha kata ka por bad napdeng ki san tylli ki ri kiba khlain bha ha ki kam ïalehkai ha ka pyrthei ha u snem 2047.
Habaai jing kren ha kane ka sngi, u Myntri Rangbah ka Jylla u Conrad K. Sangma u la kdew ïa kane ka sngi kum u mawmer ba kongsan na ka bynta ka Jylla Meghalaya, ka thaiñ Shatei Lammihngi bad ka ri. U la ong ba ka jingsoi ïa ka Host State Contract bad ka jingplie ïa ka indoor complex ka pyni ïa ka jingkut jingmut ba ïaineh jong ka jylla na ka bynta ka kam ïalehkai bad ka jingkyntiew ïa ki samla.
U Myntri Rangbah ka jylla u la ban jur ba haduh 80 per cent na ki jingdon jingem ba ïadei bad ka kam ïalehkai jong ka Meghalaya kidei kiba la wanrah ha kine ki phra snem ba ladep, ha kaba la shna kumba 80 tylli ki madan ïalehkai ha kylleng ka jylla. U la ong ba ka sorkar ka la bei tyngka man ka por ban kyntiew ïa ki nongïalehkai lyngba ka jingpynbiang ïa ki jingdon jingem, ki prokram scholarship bad ka sienjam STAR, kaba ithuh bad kyntiew ïa ki samla kiba don sap ha ka kam ïalehkai naduh dang rit.
U Sangma u la ong ba ka jingangnud jong ka Meghalaya ka long ban pynmih ïa ki nongïalehkai kiba lah ban ïakhun ha ki kyrdan ïalehkai ba ha khlieh duh jong ka ri bad shabar ri. Haba pynpaw ka jingngeit skhem ba ki nongïalehkai na ka jylla Meghalaya bad ka thaiñ shatei lammihngi kin wanrah nam bad burom ïa ka ri India ha ka Olympic Games ka ban sa wan, u la batai ïa kane ka jaka ba dang plie thymmai kum ka dak jong ka jingangnud, ka lad bad ka jingkyrmen na ka bynta ki pateng ki ban sa wan.
U Myntri ka Tnad kam ïalehkai ka jylla Meghalaya u Bah Wailadmiki Shylla u la kren shaphang ka jingpynïar sted ïa ki jingdon jingem ba ïadei bad ka kam ïalehkai ha kylleng ka jylla. U la pyntip ba haduh 240 tylli ki projek ba ïadei bad ki jingdon jingem na ka bynta ka kam ïalehkai ki la dep, ki dang ïaid shakhmat ne dang shna, bad la khmih lynti ba ka jingdon kan palat ïa ka 510 tylli ki projek shuwa u snem 2028.
U Bah Shylla u la ong ruh ba ka Sorkar Meghalaya ka la mynjur T.72.51 klur na ka bynta ki jingpynkhreh kiba ïadei bad ka 39th National Games. U la ong ba palat 50,000 ngut ki samla ba don sap la ithuh bad dang kyntiew lyngba ki prokram ba la buh ryntih, kaba pyni ïa ka lad kaba heh na ka bynta ki samla jong ka jylla Meghalaya bad ka jingangnud jong ka jylla ban kyntiew ïa ki nongjop ha ki por ban wan.
Ka President ka Indian Olympic Association ka U P. T. Usha, ka la ai khublei ia ka Sorkar Meghalaya na ka bynta ka jingshimkhïa bad ka jinglong nongïalam jong ka ha kaba pynkhreh ïa ka National Games. Ka la batai ïa ka jingsoi ïa ka Host State Contract ba la pynkylla thymmai kum ka sienjam kaba kongsan ban pynpoi ïa ka National Games ka ban ai mynsiem ïa ki nongïalehkai, ban pynkhlain ïa ka jingïatylli jong ka ri bad ban wahrah ïa ka kam ïalehkai kaba khlain bha.
Ka Usha u la ong ba ka National Games kaba 39 kan long kaba kongsan namar, ha ka sien kaba nyngkong, yn pynlong ïa ka lympung ïalehkai ha kylleng ka thaiñ shatei lammihngi. Ka la ong ba kane ka Lympung ïalehkai kan ai ka lad ban pyni ïa ka sap ka phong, ka kolshor bad ki jingangnud jong ka thain shatei lammihngi sha ka ri baroh kawei.
Haba kren shaphang ka jingdonkam ban ithuh ïa ki sap bad ban kyntiew ïa ki nongïalehkai, ka la ong ba ka jingïapher hapdeng u nongïalehkai uba don jingkyrmen bad u nongjop bunsien ka shong ha ka lad, ka jinghikai katkum ka science, ka jinghikai kaba bha bad ka jingkyrshan kaba neh. Ka la ïaroh ruh ïa ka bynta ba kongsan jong ka Meghalaya State Olympic Association bad pynpaw ka jingngeit skhem ba kane ka Lympung ïalehkai kan long ka dak jong ka ri India kaba sngewskhem, kaba angnud bad kaba ïatylli, ha kaba ka thaiñ shatei lammihngi kan long bynta pdeng jong ka lawei jong ka kam ïalehkai jong ka ri.
Ka jingplie ïa ka Integrated Multipurpose Indoor Sports Complex bad ka jingsoi ïa ka Host State Contract na ka bynta ka 39th National Games 2027 ka pyni ïa ki mawmer ba kongsan ha ka jingïaid lynti ka kam ïalehkai jong ka Meghalaya bad pynskhem biang ïa ka bynta ba nang kiew jong ka jylla ha ka jinglong jingman ka jingkiew ka kam ïalehkai jong ka ri India. (PIB)