Watla dait-thah ha u 2024 hynrei saw shah kiew ka vote jong ka seng ha elekshon MDC : Metbah

Shillong, Jymmang 28 : Ka United Democratic Party (UDP) ha ka sngi Palei ka la pynkut noh ïa ki khubor hamsaïa kiba la neh slem da ka jingpynbna paidbah ba ka la jied ïa u nongïasaid aiñ ba pawnam ka jylla, u Bah Vivanstone G Kharngapkynta kum u kyrtong jong ka party ha kane ka elekshon MP shiteng samoi.
Ha shwa ban pynbna ïa ka kyrteng jong u Bah VGK Kynta kum u kyrtong, u President ka party, Bah Metbah Lyngdoh u la ïathuh ba ka jingpynskhem ïa ka kyrteng ka dei hadien ba ki la ïa thir bad ïatai sani bha hapdeng ki nongïalam jong ka party.
“Nga dap da ka jingkmen ban pyntip sha ki nongkyrshan ka UDP bad ki nongthep vote jong ka Shillong parliamentary constituency ba hadien ka jingïathir bad ïatai kaba slem, da kawei ka sur ngi la shim ïa ka rai ban mynjur noh ïa ka kyrteng jong u Vivanstone G Kharngapkynta kum u kyrtong jong ka party,” u la ong.
Na ka liang u President Rangbah jong ka party, Bah Metbah Lyngdoh haba kren ha ka jingïalang u la ong ba lada phai dien ïa ka elekshon MP ha u snem 2024 ka jingkyrshan kaba ki ïoh ka dait-thah bad kam don jingkyrmen. “Hynrei ynda la poi pat ka elekshon MDC ka jingïoh vote jong ka party ka la kiew biang haduh saw shah,” u la ong.
Katkum ka jingong jong u, ka party mynta ka la ïoh mynsiem bha namar na ki khyndiat phew hajar ba ki ïoh ha ka elekshon MP ha u snem 2024 mynta tang hadien khyndiat por ba ki ïakhun pat ka elekshon MDC ha u 2025 ka jingïoh vote jong ka party ka la kot sha ka 1.45 lak ngut.
U la ïathuh ruh ba hapdeng ka jingduh mynsiem ha ka elekshon MP hynrei ynda la poi ka elekshon MDC pat ki la jop pynban haduh san ngut na KHADC bad lai ngut na JHADC nalor ba ki don bun ngut ki kyrtong kiba la jan poi sha ka thong.
Shuh shuh u la ïathuh ruh ba ka la don ka jingpynbor ban ym dei kyrtong ha kane ka elekshon shiteng samoi hynrei bun ki nongïalam na kylleng ka rilum Khasi-Jaintia ki kwah ba dei beit ban ïakhun.
“Ki don kiba kwah ban ym sei kyrtong ha kane ka elekshon bad don pat kiba ai jingmut ban shu leit kyrshan noh ïano ïano,” u la ong.
U la ong ruh ba la ar bnai mynta u la ïoh pdïang ïa ka jingai jingmut na kylleng ki constituency ka rilum Khasi-Jaintia kiba la ai jingmut ba dei beit ban pynieng kyrtong.
“Ynda nga pyrkhat bha nga kylli ïalade ba ha ka sngi thep vote kum u President ka Party ïano ngan kyrshan lada ngim don u kyrtong lajong na ka UDP? Kata ka dei ka jingkylli kaba nga kylli ïalade.”
Haba ïadei pat bad u kyrtong, na ka liang u President u la ïathuh ba ka jingjied ïa une u rangbah ka dei da ka jingïamon lang baroh arliang.
Na ka liang u General Secretary ka Party, Bah Titos W Chyne pat u la ïathuh ba ka jingïalap elekshon na ka bynta u kyrtong kan sdang na Sohra ha ka taiew ban wan.
Ha kane ka jingïalang pynbna kyrtong jan baroh ki MLA bad MDC jong ka party ki la poi lut kynthup ïa baroh ki nongïalam jong ka party na kylleng ki constituency.